काठमाडौं । प्रधानमन्त्री केपी शर्मा ओलीविरुद्ध पुस ५ गते संसद् सचिवालयमा दर्ता भएको अविश्वास प्रस्तावबाट दाहाल–नेपाल समूह पछि हटेको छ ।
सोमबार बिहान बसेको सचिवालय बैठकले अविश्वास प्रस्ताव तत्काल अघि नबढाउने निर्णय गरेको वरिष्ठ नेता झलनाथ खनालले जानकारी दिए ।
उनले भने, “हामीले पुस ५ गते दर्ता गरेको अविश्वासको प्रस्ताव तत्काल अघि नबढाउने निर्णय गरेका छौैँ । अरु पार्टीहरुसँग पनि छलफल गरेर के गर्ने भन्ने निर्णयमा पुग्छौँ ।”
सचिवालयकै एक सदस्यका अनुसार अहिले अविश्वासको प्रस्ताव अघि नबढाउँदा पार्टी एकताको सम्भावना पनि कायमै रहेकाले यो निर्णय गरिएको हो ।
के त्यसो भए नेकपा अझै एकताको बाटोमा छ त ? दाहाल–नेपाल समूहका अध्यक्ष पुष्पकमल दाहाल प्रचण्डले प्राइम टाइम्स टेलिभिजनलाई दिएको अन्तर्वार्तामा अहिले कुनै सम्भावना नरहेको बताए पनि दोस्रो तहका नेताहरु एकताको सम्भावनाको खोजीमा लागेको स्रोत बताउँछ ।
ती सचिवालय सदस्यले पनि एकताको सम्भावना टरिनसकेको बताए ।
पुस ५ गते प्रधानमन्त्री केपी शर्मा ओलीको सिफारिसमा राष्ट्रपतिले प्रतिनिधि सभा विघटन गरेकी थिइन् । फागुन ११ गते सर्वोच्च अदालतले संसद् विघटन गर्ने निर्णय बदर गरेपछि नेकपाभित्रको विवाद थप पेचिलो बनेको छ ।
दाहाल–नेपाल समूहका ९२ सदस्यको हस्ताक्षरसहितको अविश्वास प्रस्ताव संसद् सचिवालयमा विचाराधीन छ ।
