काठमाडौं । भूकम्पले क्षतिग्रस्त सेतो मच्छिन्द्रनाथ मन्दिरको संरक्षण तथा प्रवलीकरण सुरु भएको छ ।
महानगरपालिका ३५, जनबहालस्थित रहेको मन्दिरको आइतबार आयोजित एक कार्यक्रमबीच नेपाल पुनर्निर्माण प्राधिकरणका प्रमुख कार्यकारी अधिकृत सुशील ज्ञवाली र नेपालका लागि भारतीय राजदूत विनयमोहन क्वात्राले संयुक्त रुपमा शिलान्यास गरेका छन् ।
२०७२ को भूकम्पबाट क्षतिग्रस्त यो मन्दिरको भारत सरकारको ६ करोड २६ लाख रुपैयाँ अनुदान सहयोगमा प्रवलीकरण हुन लागेको हो । सांस्कृतिक सम्पदा क्षेत्रको पुनर्निर्माणमा भारत सरकारले प्रतिबद्धता जनाएको करिब पाँच अर्ब ८० करोड रुपैयाँ (५० मिलियन अमेरिकी डलर) आर्थिक अनुदानअन्तर्गत पुनर्निर्माण हुन लागेका २८ सम्पदामध्ये यो पहिलो परियोजना हो ।
मन्दिर प्रवलीकरण शिलान्यास गर्दै प्राधिकरणका प्रमुख कार्यकारी अधिकृत ज्ञवालीले पुरानै प्रविधि, परम्परागत निर्माण सामग्री प्रयोग गरेर मन्दिरको प्रवलीकरण गरिने बताए । “भूकमपबाट क्षतिग्रस्त ४६५ पुरातात्त्विक सम्पदाहरुको पुनर्निर्माण सम्पन्न भइसकेको र भारत सरकारको सहयोगमा पुनर्निर्माण हुने सम्पदाहरुको काम अगाडि बढ्ने बताए ।
कार्यक्रममा भारतीय राजदूत क्वात्राले नेपालका पुरातात्त्विक सम्पदा दुई देशको सम्बन्धमा आधारशीला भएको उल्लेख बताए । कार्यक्रममा काठमाडौं महानगरपालिकाका प्रमुख विद्यासुन्दर शाक्यले काठमाडौं महानगरपालिकाले विभिन्न सम्पदाहरुको संरक्षण तथा पुनर्निर्माणमा सहयोग गर्ने बताए ।
सम्पदा पुनर्निर्माण तथा प्रवलीकरणको डिजाइन तथा पुरातात्त्विक अनुगमन पुरातत्त्व विभागले गर्नेछ । यस्तै प्राधिकरण मातहतको केन्द्रीय आयोजना कार्यान्वयन एकाइ (भवन) ले ठूला सम्पदाको कार्यान्वयन गराउँछ । यी सम्पदाहरु नेपालको प्राचीन स्मारक संरक्षण ऐनले निर्धारण गरेको मापदण्डअनुरूप प्रवलीकरण हुनछन् । सेतो मच्छिन्द्रनाथको मन्दिर १०औँ शताब्दीमा मल्ल युगमा निर्माण गरिएको विश्वास छ ।