काठमाडौं । प्रतिनिधिसभाका सभामुख अग्निप्रसाद सापकोटाले जनताको र संविधानवादको जित भएको बताएका छन् । सर्वोच्च अदालतले प्रतिनिधिसभा विघटन गर्ने सरकारको निर्णयलाई बदर गरेलगत्तै प्रतिक्रिया दिँदै उनले सर्वोच्चको फैसलाले संविधानवादको जित भएको बताएका हुन् ।
उनले प्रतिनिधिसभा विघटन गर्ने प्रधानमन्त्री केपी शर्मा ओलीको निर्णयलाई बदर गर्ने सर्वोच्चको फैसलाले राज्यका महत्त्वपूर्ण अंगको शक्ति पृथकीकरण र भूमिकाबारे पनि स्पष्ट मार्ग निर्देश गरेको बताए ।
उनले भने, “सर्वोच्चको आजको फैसलाले समस्त नेपाली जनताको जित भएको छ । संविधानवादको जित भएको छ र नेपाली जनतामा अदालतप्रतिको विश्वास थियो त्यो विश्वासले अर्को कोणात्मकता हासिल गरेको छ ।” यसले एउटा नयाँ आयाम खडा भएको उनले बताए ।
साथै यसले लोकतन्त्रको विकास विस्तार र सुदृढीकरणमा पनि महत्त्वपूर्ण भूमिका खेलेको सापकोटाको दाबी छ । फैसलाको प्रारम्भिक अध्ययन गर्दा राज्यका महत्त्वपूर्ण अंगहरुको शक्ति पृथकीकरण र भूमिकाबारे स्पष्ट मार्ग निर्देश गरेको उनको भनाइ छ ।
पुस ५ गतेदेखि आजको दिनसम्म बहसको विचबाट यसले संविधानको रक्षा मात्रै होइन विकास र समृद्धि गर्नुका साथै कार्यान्वयन गर्नका लागि निकै राम्रो आधार खडा गरेको बताउँदै सापकोटाले भने, “सभामुखको हैसियतले म के भन्न चाहन्छु भने मैले शपथ लिएकै दिन संसद्लाई जीवन्त र जनमुखी बनाउने भनेर संकल्प गरेको थिएँ । त्यो संकल्प पूरा गर्न आधारशिला खडा भएको छ ।”
सर्वोच्चको संवैधानिक इजालासले गत पुस ५ गते प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गरेको प्रतिनिधिसभा विघटन गर्ने निर्णयलाई बदर गरेको छ ।
प्रधानन्यायाधीश चोलेन्द्रशमशेर राणा नेतृत्वमा न्यायाधीशहरु विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसी रहेको संवैधानिक इजलासको सर्वसम्मतिले प्रतिनिधिसभा विघटन गर्ने सरकारको निर्णयलाई बदर गरेको हो । फैसलामा १३ दिनभित्रै संसद् बैठक बोलाउन पनि भनिएको छ ।