काठमाडौं । साताको तेस्रो दिन बिहीबार तीव्र उतारचढाव देखिएको सेयर बजार करिब शून्य दशमलव ८१ प्रतिशतको गिरावटसहित बन्द भएको छ । सुरुवातबाट तीव्र गिरावट देखिएको बजार परिसूचक कारोबार सुरु भएको करिब २ घण्टा पूरा हुँदा ८८ अंक भन्दा माथिको गिरावट देखिए पनि १ बजेपछि क्रमिक सुधार देखिएको थियो । अन्त्यमा नेप्से २१.१६ अंकले घटेर २५८६.५१ अंकमा बन्द भएको छ ।
आज (मंगलबार) को कारोबार दिनमा सेयर बजारमा सुरुवातबाटै तीव्र उतारचढाव देखिएको थियो । बजारमा फैलिएका विभिन्न हल्लाले गर्दा सुरुमा अत्यधिक बिक्री चाप देखिए पनि पछि हल्ला निराधार भएको समचारसँगै बजारमा विस्तारै लयमा फर्किएको हो ।
मंगलबार १९ अंकमाथिले बढेर २६२७.३४ अंकमा खुलेको नेप्से सुरुमा केही सेकेन्ड थोरै वृद्धि हुँदा ‘इन्ट्रा-डे’ कारोबारमा २६३१.७४ अंकको उच्च विन्दुसम्म पुगेको नेप्से करिब १ बजे २५१९.२० अंकसम्म झरेको थियो । आजको कारोबार दिनमा नेप्सेमा १०१२ अंकभन्दा माथिको उतारचढाव देखिएको हो ।
धितोपत्र दलाल व्यवसायी भरत रानाभाट केही हल्ला र नेपाल इन्फ्रास्ट्रक्चर बैंकको कारण पनि आज सेयर बजारमा ठूलो उतारचढाव देखिएको बताउँछन् । संसद् विघटनको बहस सकिएसँगै सर्वोच्च अदालतले फैसला सुनाउने समय नजिक आउँदै गर्दा संसद् पुन:स्थापना भए संकटकाल लाग्ने अथवा सदर भए आन्दोलनको आँधी आउनसक्ने हल्लाले बजार प्रभावित भएको देखिन्छ । लाला व्यवसायी रानाभाट पनि राजनीतिक घटनाक्रम नै आज सेयर बजारमा उतारचढाव देखिएको रानाभाट बताउँछन् ।
उनका अनुसार लगातार सकारात्मक सर्किट लाग्दै आएको नेपाल इन्फ्रास्ट्रक्चर बैंकको सेयर मूल्यमा सुरुवाति सकारात्मक र लगत्तै नकारात्मक सर्किट लाग्दा बजार परिसूचक प्रभावित भएको हो । त्यसको प्रभावले अरु कम्पनीको पनि मूल्य घट्नसक्ने लगानीकर्ताको बुझाइले पनि आज बजार प्रभावित भएको उनको बुझाइ छ ।
उनले भनेजस्तै नेपाल इन्फ्रास्ट्रक्चर बैंकको सेयर मूल्यमा नकारात्मक सर्किट लाग्दा बैंकिङपछि बजारमा सबैभन्दा ठूलो हिस्सा रहेको अन्य उपसूचक सबैभन्दा धेरै २.३३ प्रतिशतले घटेको छ । यस्तै उत्पादन उपसूचक १.६८ प्रतिशत, विकास बैंक उपसूचक १.१२ प्रतिशत र होटेल उपसूचक १.५४ प्रतिशतले घट्दा बैंकिङ उपसूचक पनि ०.४१ प्रतिशतले घटेको छ । आज एकमात्रै व्यापार उपसूचक ०.९ प्रतिशतले बढेको छ ।
सुरुवाति समयमा घट्दो बजारमा उच्च कारोबार हुने संकेत देखिए पनि क्रमिक सुधारोन्मुख हुँदा कारोबार रकमले गति लिन नसके पनि आज बजारमा साढे ८ अर्बमाथिको कारोबार भएको छ । दुई घण्टामै पाँच अर्ब १३ करोड रुपैयाँको कारोबार भए पनि १ बजेपछि कारोबार रकम उल्लेख्य बढेन ।
आज नेप्सेमा ८३ हजार ३५७ कारोबारमा २०५ कम्पनीको एक करोड ७७ लाख १४ हजार ९१२ कित्ता सेयर किनबेच हुँदा ८ अर्ब ५६ करोड १५ लाख ३९ हजारको कारोबार भएको छ । २० प्रतिशतले सेयर मूल्यमा उतारचढाव देखिएको नेपाल इन्फ्रास्ट्रचरको सर्वाधिक ७३ करोड ९४ लाख ५३ हजारको कारोबार भएको छ ।
यस्तै अपर तामाकोसी हाइड्रोपावरको सेयर मूल्य ४३ करोड ३९ लाख १ हजार र नबिल बैंकको ३७ करोड ३५ लाख ५९ हजारको कारोबार भएको छ । त्यस्तै एनआईसी एशिया बैंकको ३२ करोड ८० लाख ५० हजार र ग्लोबल आईएमई बैंकको सेयर मूल्य २९ करोड ६२ लाख ९२ हजार रुपैयाँको कारोबार भएको छ ।