काठमाडौं । नेपाली कांग्रेसका महामन्त्री शशांक कोइरालाले स्वतन्त्र विद्यार्थी युनियनको निर्वाचनलगायतका पाँचबुँदे माग गर्दै नेविसंघले गरेको अनशनमा ऐक्यबद्धता जनाएका छन् ।
नेविसंघ त्रिभुवन विश्वविद्यालय एकाइको आयोजनामा १९ दिनदेखि उपकुलपतिको कार्यालयअगाडि अनशन जारी राखेका छन् । अनशनमा ऐक्यबद्धता जनाउन महामन्त्री कोइराला आज विश्वविद्यालय, कीर्तिपुर नै पुगेका थिए । उनले नेविसंघका विद्यार्थीहरुले उठाएका मागमा आफ्नो ऐक्यबद्धता रहेको बताए ।
अनिश्चितकालीन रिले अनशनमा पार्टीका शीर्ष नेताहरुले ऐक्यबद्धता जनाउने क्रम जारी रहेको र माग पूरा नभएसम्म अनशन जारी रहने नेविसंघका पूर्वकोषाध्यक्ष शिव रिमालले जानकारी दिए । यसअघि कांग्रेस वरिष्ठ नेता रामचन्द्र पौडेल, नेता प्रकाशमान सिंह, रामशरण महत, अर्जुननरसिंह केसी, दिलेन्द्र बडू, नवीन्द्रराज जोशी, गुरुराज घिमिरेले ऐक्यबद्धता जनाइसकेका छन् ।
