काठमाडौं । युवालाई राजनीतिमा ‘अवैतनिक म्यादी प्रहरी’का रुपमा मात्र उपयोग नगरी नीति निर्माणको निर्णायक तहमा पनि पुर्याइनुपर्नेमा नेपाली कांग्रेसका युवा नेताहरुले जोड दिएका छन् ।
बीपी कोइराला युवा नेतृत्व विकास मञ्चले आज राजधानीमा आयोजना गरेको ‘प्रजातन्त्र प्राप्तिका सात दशक, नेपाली कांग्रेस, नीति, नेतृत्व, संघर्ष र युवा पुस्ता’ विषयक विचार विशेष बहस कार्यक्रममा उनीहरुले युवालाई व्यवस्था परिवर्तनको आन्दोलनमा प्रयोग गर्ने र सफलतापछि बिर्सने परिपाटीको अन्त्य गरिनुपर्नेमा जोड दिएका हुन् ।
पूर्वमन्त्री एवं कांग्रेस केन्द्रीय सदस्य दिलेन्द्रप्रसाद बडूले अबको महाधिवेशनले पार्टीको नेतृत्व तहमा युवालाई स्थापित गर्ने उल्लेख गर्दै नेतृत्वको जिम्मेवारी बहन गर्ने गरी युवा पुस्ता तयार हुनुपर्ने बताए ।
नेता उमाकान्त चौधरीले बीपीको पालामा देशको संविधान र पार्टीको विधान समावेशी नभए पनि कर्म समावेशी भएको तर अहिले दुवै कानुन समावेश भए पनि व्यवहार त्यसअनुरुप हुन नसकेको बताए । युवालाई नेतृत्वमा स्थापित गर्न समावेशी कर्म गर्न पार्टीका नेतृत्वलाई उनले सुझाव दिए ।
नेतृ महालक्ष्मी (डीना) उपाध्यायले मुलुकले खोजेजस्तो लोकतन्त्र अझै स्थापना हुन नसकेकाले संघर्ष चलिरहेको बताइन् । नेता गुरुराज घिमिरेले संयुक्त राष्ट्रसंघले नै जारी गरेको प्रतिवेदनमा विश्वका दुईतिहाइ मुलुकमा राजनीतिक परिवर्तन युवाका कारण हुने गरेको बताउँदै आन्दोलन सफल भएपछि भने वास्ता नगर्ने गरेको धारणा व्यक्त गरे । परिवर्तनपछि चुप लागेर बस्दा पनि युवा नेतृत्वमा आउन नसकेकाले अब जागरुक हुन उनले बताए ।
मञ्चका अध्यक्ष नीलकण्ठ रिजाललगायत विभिन्न पेसा र व्यवसायमा आबद्ध युवाले सबै क्षेत्रमा युवाको प्रतिनिधित्व हुनुपर्नेमा जोड दिए । रासस
