काठमाडौं । नेपाली सेनाले काठमाडौं-तराई द्रुतमार्गको जटिलकार्य गर्ने निर्माणकर्ता छान्ने प्रक्रिया पारदर्शी भएको दाबी गरेको छ ।
संघीय संसद् राष्ट्रियसभाको प्रत्यायोजित व्यवस्थापन तथा सरकारी आश्वासन समितिको बुधबारको बैठकमा काठमाडौं-तराई द्रुतमार्गअन्तर्गत फेज टुका ठेक्का विषयमा परेको उजरीमाथि भएको छलफलमा नेपाली सेनाले द्रुतमार्गको जटिलकार्य गर्ने निर्माणकर्ता छान्ने प्रक्रियामा कुनै अनियमितता नभएको दाबी गरेको हो ।
समितिमा काठमाडौं-तराई द्रुतमार्गको जटिलकार्य गर्ने निर्माणकर्ता छान्नका लागि नेपाली सेनाले पूर्वयोग्यता निर्धारण गर्न मागेको आवेदनमा आवश्यकभन्दा कम कम्पनीहरु छानिएको भन्दै उजुरी परेको थियो । सेनाले पूर्वयोग्यता परीक्षणमा नेपाली कम्पनीबाहिर पारिएको भन्दै विरोध भइरहेको छ । यसै विषयमा समितिले द्रुतमार्ग हेर्ने सेनाका अधिकारीहरुलाई बोलाई स्पष्टीकरण लिएको हो ।
छलफलमा सेनाका महासेनानी एवं खरिद व्यवस्थापन महाशाखाका प्रमुख सुनीलसिंह राठोरले सार्वजनिक खरिद ऐनअनुसारै पूर्वयोग्यता निर्धारण गरिएको बताए । आयोजनाको निर्माण कार्य वि.सं. २०८१ मा सम्पन्न गर्नुपर्ने भएकाले तत्काल टेन्डर आह्वान गरी निर्माणलाई तीव्र बनाउने प्रक्रिया सुरु गरिएको पनि उनले बताए ।
सेनाले पूर्वयोग्यताका लागि २०७६ फागुन ३० गते सार्वजनिक रुपमा आवेदन आह्वान गरेको थियो । २०७६ चैत ११ गतेदेखि बन्दाबन्दी भएपछि सार्वजनिक खरिद अनुगमन कार्यालयले २०७६ चैत २५ गते पठाएको पत्रअनुसार म्याद थप गरी २०७७ भदौ ३० गते मात्रै प्रि-सबमिसन मिटिङ गर्न सफल भएको पनि महासेनानी राठोरले बताए ।
प्रि-सबमिसन मिटिङमा २१ प्रतिनिधिको उपस्थिति रहेको र उपस्थित हुन नसकेकालाई जानकारी गराइएको उनको भनाइ छ । त्यसपछि २०७७ असोज १४ गते खोलुवा मुचुल्का तय गर्दा प्याकेज नं. १ मा २१ वटा र प्याकेज नं. २ मा २२ वटा अन्तर्राष्ट्रिय कम्पनीहरुको आवेदन परेको थियो । यस्तै २०७७ पुस ९ गते मूल्याङ्कन समितिले गरेको मूल्याङ्कनअनुसार प्याकेज नं. १ मा २ जना र प्याकेज नं. २ मा १ जना अन्तर्राष्ट्रिय कम्पनी सूचीकृत भएको महासेनानी राठोरले बताए ।
द्रुतमार्ग आयोजनाका प्रमुख विकास पोखरेलले काठमाडौं-तराई द्रुतमार्गमा जटिल किसिमको काम गर्नुपर्ने ठाउँहरुलाई ११ क्लस्टरमा विभाजन गरिएको बताए । त्यसमध्ये ५ र ६ नम्बर क्लस्टर अति जटिल भएकाले निर्माणकर्ता छनोट गर्दा पूर्वयोग्यता निर्धारण गर्नुपरेको र सार्वजनिक खरिद नियमावली अनुसारै सो कार्य सम्पन्न गरिएको बताए ।
काठमाडौं-तराई द्रुतमार्ग ७२ दशमलव ५ किलोमिटरको छ । जसमा तीनवटा सुरुङ मार्ग र ८७ वटा पुलहरु निर्माण हुनेछन् । बाटोको चौडाइ पहाडमा २५ मिटर र तराईमा २७ मिटर रहनेछ । द्रुतमार्गमा पर्ने तीनवटै सुरुङमार्गको लम्बाइ ६ किलोमिटर हुनेछ भने ८७ वटा पुलको कुल लम्बाइ १० किलोमिटर रहनेछ । द्रुतमार्गमा जटिल किसिमको काम गर्नुपर्ने ठाउँहरुलाई ११ क्लस्टरमा विभाजन गरि काम सुरु भएको छ ।
