काठमाडौं । सर्वाेच्च अदालतको संवैधानिक इजलासमा अदालतको सहयोगी (एमिकस क्युरी)ले राय राख्ने क्रम सुरु भएको छ । अहिले एमिकस क्युरीमा रहेका वरिष्ठ अधिवक्ता बद्रीबहादुर कार्कीले राय राखिरहेका छन् ।
उनले संविधान बनाउनेहरुले नै संविधान दुर्घटनामा परेको महसुस गरेको बताए । ‘‘जसले संविधान बनायो । जसले लागु गर्नुपर्ने थियो, ती सबै संविधान संकटमा पर्यो भनेर आन्दोलनमा छन् । अर्थात तिनले संविधान दुर्घटनामा पर्यो भनेर महसुस गरेका छन् । त्यसैले तपाइँहरु पाँचजनालाई श्रीमान् गम्भीर र ठूलो जिम्मेवारी आइपरेको छ,’’ उनले भने ।
प्रतिनिधिसभा विघटनविरूद्ध दायर रिटमा सोमबार पक्ष–विपक्षको बहस सकिएपछि आजबाट एमिकस क्युरीले राय राखिरहेको हो । नेपाल बार एसोसिएसनबाट तीन र सर्वाेच्च अदालत बार एसोसिएसनबाट दुई गरी पाँचजना वरिष्ठ अधिवक्ताको एमिकस क्युरी छ । पूर्णमान शाक्य, विजयकान्त मैनाली, बद्रीबहादुर कार्की, गीता संग्रौला र सतिशकृष्ण खरेलको एमिकस क्युरीले प्रतिनिधिसभा विघटनको विषयमा आफ्नो राय राख्नेछन् । एमिकस क्युरीको राय सुनेपछि केही दिनमै इजलासले फैसला सुनाउनेछ ।
गएको पुस ५ गते प्रतिनिधिसभा विघटन गरिएको थियो । विघटन असंवैधानिक भन्दै दायर १३ वटा रिटमाथि संवैधानिक इजलासमा सुनुवाइ जारी छ ।
