काठमाडौं । सरकारले कोभिड १९ विरुद्धको २० लाख डोज खोप खरिदका लागि तयारी अगाडि बढाएको छ । थप ४० लाख जनतालाई पुग्ने खोप खरिदका लागि भारतको सिरम इन्स्टिच्युट अफ इन्डिया र अन्य विभिन्न कम्पनीसँग जिटूजी प्रक्रियामार्फत प्रक्रिया अघि बढाइएको स्वास्थ्य तथा जनसंख्या मन्त्रालयले जानकारी दिएको छ । नेपालमा २० लाख डोज खोप भारतबाटै ल्याउने लक्ष्यका साथ सरकारले प्रक्रिया अघि बढाएको स्वास्थ्य तथा जनसंख्या राज्यमन्त्री नवराज रावतले बताए ।
खोप शुल्कबारे नेगोसिएसन भइरहेको छ
अहिले प्रयोग भइरहेकै कोभिसिल्ड खोप खरिदका लागि स्वास्थ्य तथा जनसंख्या मन्त्रालयले भारतको सिरम इन्स्टिच्युट अफ इन्डियासँग पत्राचार गरेको थियो । प्रतिडोज ४ डलरका दरले सिरमले २० लाख डोज खोप उपलब्ध गराउनसक्ने तर खोप शुल्कको ८० प्रतिशत रकम पेस्कीस्वरुप उपलब्ध गराउनुपर्ने सर्त राखेपछि यसबारे छलफल अगाडि बढाइएको मन्त्रालय स्रोतको दाबी छ । मन्त्रालयका प्रवक्ता डा. जागेश्वर गौतम भन्छन्, “अहिले यही कम्पनीबाट ल्याउने भन्ने निश्चित भएको छैन, केही कम्पनीले ८० प्रतिशत पेस्की रकम माग गरेका छन् भने केहीले त्योभन्दा कम पनि मागेका छन् । अहिले तिनै कम्पनीहरूबीच नेगोसिएसनको काम हामी गरिरहेका छौं ।”
‘खोप खरिदका लागि आवश्यक रकमको व्यवस्था गरिसकिएको र आवश्यक परेको जुनसुकै समयमा उपलब्ध गराइने’ अर्थ मन्त्रालयका प्रवक्ता रामप्रसाद घिमिरेले बताए ।
दोस्रो डोज खोप दिने समयसम्म थप खोप ल्याउँछौं
कोभिड १९ विरुद्धको खोप पहिलो चरणको अभियान माघ १४ गते सुरु गरिएको थियो । दोस्रो डोज खोप भने फागुन २४ गतेबाट दिने योजना स्वास्थ्य तथा जनसंख्या मन्त्रालयले गरेको छ । ‘दोस्रो डोज खोप दिन सुरु गर्दासम्म थप २० लाख डोज खोप ल्याइसक्ने’ स्वास्थ्य तथा जनसंख्या राज्यमन्त्री नवराज रावतले बताएका छन् । कोभ्याक्स कार्यक्रमअन्तर्गत नेपालमा मार्चको पहिलो साता खोप आउने योजना भए पनि त्यसअघि सरकारले नै खोप खरिद गरेर ल्याउने राज्यमन्त्री रावतले दाबी गरे ।
दोस्रो चरणको प्राथमिकतामा को-को ?
कोभिड १९ विरुद्धको खोप अभियानअन्तर्गत दोस्रो चरणको प्राथमिकतामा सरकारले ५५ वर्षमाथिका ज्येष्ठ नागरिक र ४५ वर्षमाथिका दीर्घरोगीलाई राखेको छ । खोप विभाग प्रमुख डा. झलक शर्मा गौतमले ‘कोभिड १९ बाट मृत्यु हुनेमा सबैभन्दा बढी यी दुई वर्गका नागरिक परेकाले अबको चरणमा ज्येष्ठ नागरिक र दीर्घरोगीलाई खोप दिने प्राथमिकतामा राखिएको’ बताए । यसअघि पहिलो चरणको १० लाख डोज खोप अभियानअन्तर्गत आइतबारसम्म दुई लाख २४ हजार ५२० जनालाई ५ लाख डोजभन्दा बढी खोप दिइएको छ ।