पोखरा । उपप्रधानमन्त्री एवं नेकपा ओली समूहका नेता ईश्वर पोखरेलले पोखरामा पत्रकारहरू माझ नागरिक समाजमाथि व्यंग्य हानेका छन् ।
कामचलाउ प्रधानमन्त्री तथा नेकपाका अध्यक्ष केपी शर्मा ओलीले संसद् विघटन गरेसँगै त्यसको निरन्तर विरोध तथा प्रदर्शन भइरहेको छ । संसद् पुन:स्थापनाको मुद्दा अदालतमा विचाराधीन छ भने त्यसको पक्षमा नेकपाकै अर्को प्रचण्ड-माधव नेपाल समूहसहित प्रतिपक्षी दलहरू र नागरिक समाज सडकमा ओलीको कदमलाई प्रतिगमन भन्दै विरोध र प्रदर्शनमा उत्रिएका छन् ।
'नागरिक समाजको प्रदर्शनमा पूर्वपत्रकारहरू पनि संलग्न'
ओलीनिकट पत्रकारको संस्था प्रेस संगठन नेपालको कार्यक्रममा उनले पत्रकारमा दलनिकट विचार र पेसागत दक्षता दुवै नहुँदा नागरिक समाजमा परिणत हुने बताएका हुन् । उनले भने, “पेसागत दक्षता प्रदर्शन गर्नैपर्छ । यो आलोचना गरेजस्तो लाग्ला तर दक्षता हुनैपर्छ । दक्षता नहुने हो भने यो क्षेत्रमा अगाडि बढ्न सकिँदैन । र विचारप्रतिको प्रतिबद्धता पनि हुनुपर्यो । भएन भने बिग्रिन्छ ।”
ओलीनिकट पत्रकारलाई पेसागत दक्षता र विचार सिकाउँदै उनले ‘टु इन वान’ हुन आग्रह गरे । “नेकपा सम्बद्धित साथीहरू के बुझ्नुपर्छ भने ‘टु इन वान’ हुनुपर्छ । म विचार बोकेको एउटा कार्यकर्ता पनि हो, पेसागत दक्षता भएको कार्यकर्ता पनि हो । यो दुईटै चिज सँगसँगै हुनुपर्छ । एउटा कुरा मात्र भएर काम चल्दैन, तपाईंहरूका लागि चल्दैन । कोही पार्टीमा कस्सिएर काम गर्ने कार्यकर्ता हुन्छन्, तर पेसागत दक्षता हुँदैन, भए पनि कम हुन्छ । कोहीचाहिँ पेसागत दक्षता त खुब भयो, वरिष्ठ पत्रकार हुनुभयो । टेलिभिजनमा जिम्मेवारी पाउनुभयो, रेडियोमा जिम्मेवारी पाउनुभयो । वरिष्ठ पत्रकार हुनुभयो । अनि पछि विस्तारै विचार त पातलिँदै जान्छ,” उनले भने, “विचार पन्यालो हुँदै जान्छ, अलिनो हुँदै जान्छ । मान्छे त्यही हो, पेसागत क्षेत्रमा जिम्मेवारी पायो, विस्तारै ठूलोठूलो हुँदै गयो, वरिष्ठ पत्रकार पनि भयो । तर, विचारचाहिँ विस्तारै पातलो हुँदै गयो । यस्ता मान्छेहरू भेटिन्छन्, तपाईंको पंक्तिमा छन् कि छैनन् विचार गर्नुहोला ।”
विचार र दक्षतामध्ये एकमात्रै क्षमता भएको व्यक्ति अन्तिममा नागरिक समाजमा परिणत हुने उनले बताए । “कोही विचार बोकेको हो भन्छन्, पेसागत दक्षता हुँदैन, कोही पेसागत दक्षता मसित छ, मैले विकास गरेँ भन्छन्, विचार छोड्दैछोड्दै जान्छन र पछि नागरिक समाजमा परिणत हुन्छन्,” पोखरेलले भने ।
उपस्थित पत्रकारहरूलाई उनले, त्यस्तो दुर्घटना नहोस् भन्ने चाहेको बताए । प्रेस संगठनलाई उनले दुवै क्षमता विकास गर्न आग्रह गरे । उनले भने, “विचार बोक्नैपर्छ, पेसागत दक्षता हासिल गर्नैपर्छ । त्यसकारण तपाई ‘टु इन वान’ हुनैपर्छ । ‘टु इन वान’ हुन नसक्ने हो भने हाम्रो यो प्रेस संगठन नेपालका साथीहरूले विकास गरेको मानिनेछैन ।”