काठमाडौं । प्रमुख प्रतिपक्षी दल नेपाली कांग्रेसको पुस ७ गते सुरु भएको केन्द्रीय कार्यसमिति बैठक आज नि बस्दै छ । पुस ७ मा सुरु भएर १० गते आन्दोलनमा जाने निर्णयपछि स्थगित भएको बैठक १३ गते संघीय प्रतिनिधिसभा निर्वाचन क्षेत्र केन्द्रित आन्दोलन सकेर पुसा १९ मा बसेको थियो । पुस १९मा प्रदेश निर्वाचन क्षेत्र, स्थानीय तह र वडा तीन चरणका आन्दोलन घोषणा गरेर स्थगित केन्द्रीय समिति बैठक आज बस्न लागेको हो ।
१९ गते २७ गतेका लागि डाकिएको केन्द्रीय समिति सभापति शेरवहादुर देउवाले स्थगित गरेर माघ ६ गतेका लागि डाकेका थिए । माघ ५ गते वरिष्ठ नेता रामचन्द्र पौडेलसँगको भेटपछि सभापति देउवाले पुनः बैठक स्थगित गरी आजका लागि डाकेका हुन् । दिउँसो १ बजेका लागि डाकिएको बैठकका एजेण्डा भने पुरानै भएको मुख्यसचिव कृष्णप्रसाद पौडेलले जानकारी दिए ।
प्रतिनिधिसभा विघटन गर्ने प्रधानमन्त्री केपी शर्मा ओलीको कदम असंवैधानिक भनेर आन्दोलन सुरु गरेको कांग्रेस आन्दोलनमा नेताहरुका भाषणाका क्रममा दुई धारमा देखिएको छ । सभापति शेरवहादुर देउवा र उनको गुट प्रधानमन्त्री ओलीले घोषणा गरेको निर्वाचनमा जाने पक्षमा उभिदै अदालतको फैसलापछि ओलीले तोकेकै मितिमा निर्वाचन गराउनुपर्ने पक्षमा उभिएको छ ।
वरिष्ठ नेता रामचन्द्र पौडेल र उनको गुट भने प्रतिनिधिसभा विघटन नै असंवैधानिक भएपछि निर्वाचन घोषणा पनि असंवैधानिकभन्दै उक्त कदम सच्याउन खरो रुपमा उभिनु पर्ने अडानमा छ । त्यही कारण कांग्रेसमा सर्वसम्मत निर्णय कार्यान्वयन गर्ने विषयमा मतभेद देखिएको छ ।
सभापति देउवाले सर्वोच्चको आदेश मान्ने घोषणा गरे पनि कार्यकर्तालाई निर्वाचनका लागि तयार रहनुस् भन्दै भाषण गरेपछि संविधान अनुसार फैसला आउँछ भनेर अदालतमाथि उनको विश्वास नभएको टिप्पणी भएको छ । देउवा निवासमै प्रजातान्त्रिक विचर समाजले गरेको कार्यक्रममा समेत यही विषयमा सभापति देउवा र पौडेलबीच भनाभन भएको थियो । त्यस यता सभापति देउवा र पौडेलबीच वाकयुद्ध चल्दै आएको छ । दुइजनाबीचको दुईधार अन्त्य गरेर कांग्रेसलाई एक ढिक्का बनाउन यही ५ माघमा पौडेल निवास बोहोराटार पुगेका देउवा थप असहमतिका विषय लिएर फर्किएका थिए ।
सभापति देउवाले प्रदेश १ र वाग्मती प्रदेश सभामा मुख्यमन्त्री विरुद्ध परेका अविश्वास प्रस्तावमा प्रदेश संसदीय दललाई नै निर्णय गर्न दिउँ भन्ने प्रस्ताव राखेपछि पौडेल थप असन्तुष्ट भएका थिए । उनले दुबै प्रदेशमा देउवा निकट संसदीय दलका नेता भएका कारण ओली समूहसँगै सहकार्य गर्न सक्ने भन्दै नीतिगत निर्णय केन्द्रबाट हुनुपर्ने भन्दै पौडेलले प्रस्ताव अस्वीकार गरेका थिए । त्यस विषयमा कांग्रेस अहिलेसम्म निर्णयमा पुग्न सकेको छैन ।
यस्तै पौडेल समूहले सोमबार भेला गरी केन्द्रीय स्तरमै शक्ति प्रदर्शन हुनेगरी प्रतिनिधिसभा विघटन विरुद्ध विरोध प्रदर्शन गर्नुपर्ने बताएका छन् । पौडेल समूहले केन्द्रीय समिति बैठकले माघ मसान्तभित्र क्रियाशील सदस्यता टुंग्याउने निर्णय गरे पनि अझै जिल्लाबाट क्रिलयाशील सदस्यताको विवरण नआएको भन्दै ताकेता गर्ने र बाँकी महाधिवेशन कार्यतालिका बजनाएर नियमित रुपमा अघि बढ्नुपर्ने प्रस्ताव राख्ने तयारी गरेको छ ।
देउवा समूहले भने सर्वोच्च अदालतको आदेश पर्खने र आदेशले प्रधानमन्त्रीको कदम सदर गरे महाधिवेशन छोडेर निर्वाचनको तयारी थाल्ने प्रतिनिधिसभा पुनस्थापित भए महाधिवेशनको तयारी थाल्ने रणनीति बनाएको छ ।
