काठमाडौं । उपाधि दावेदार टोटेनहमले प्रिमियर लिग फुटबलमा सहज जित निकालेको छ । आइतबार राति भएको खेलमा टोटेनहमले सेफिल्ड युनाइटेडमाथि ३–१ गोल अन्तरको जित निकाल्न सफल भएको हो ।
सेल्फिडको घरेलु मैदानमा भएको खेलमा टोटेनहमलाई जित दिलाउन ह्यारी केन, सर्ज अउरियर र टान्गुए एनडोम्बेलेले एक एक गोल गरे । उता सेफिल्डका डेभिड म्याकगोल्डरिकले एक गोल फर्काए ।
खेलको पाँचौ मिनेटमा सर्जले गोल गर्दै टोटेनहमलाई अग्रता दिलाएका थिए । ४० औं मिनेटमा केनले गोल गर्दा टोटेनहमको अग्रता दोब्बर पारे ।
५९ औं मिनेटमा सेफिल्डका डेभिडले गोल गर्दै खेल २–१ को स्थितिमा ल्याए । ६२ औं मिनेटमा एनडोम्बेलेले गोल गर्दै टोटेनहमलाई ३–१ को जित दिलाए ।
जितसँगै टोटेनहम लिगको चौथो स्थानमा उक्लिएको छ । टोटेनहमले १८ खेलमा ३३ अंक जोडेको छ । सेफिल्ड ५ अंक जोडेर पुछारमा छ ।