काठमाडौं । बृहत् नागरिक आन्दोलनले प्रधानमन्त्रीनिवास बालुवाटार घेराउ गर्ने भएको छ । प्रज्ञा प्रतिष्ठानको डबलीमा मंगलबार आयोजित प्रतिगमनविरोधी कला प्रदर्शनसहितको सभामा आन्दोलनका अगुवा नारायण वाग्लेले बालुवाटार घेर्ने घोषणा गरेका हुन् ।

नागरिक अगुवाहरुको अगुवाइमा बालुवाटार घेराउ गर्ने वाग्लेले बताए । तर, घेराउ कहिले गर्ने भन्नेबारे छिटै जानकारी गराउने उनले बताए ।

बृहत् नागरिक आन्दोलनका अभियन्ताहरुले पुस ५ गते प्रतिनिधिसभा विघटन भएपछि सो कार्य असंवैधानिक र प्रतिगमन भन्दै चरणबद्ध आन्दोलन गर्दै आएको छ । 

०६२/६३ को जनआन्दोलनका नागरिक आन्दोलनका अगुवा देवेन्द्रराज पाण्डेले ०६२/६३ को नागरिक आन्दोलनबाट बचेको २० हजार ५६ रुपैयाँ नागरिक आन्दोलनका लागि नासोका रुपमा उपलब्ध गराएको पनि वाग्लेले जानकारी दिए । डबलीमा आयोजित सभामा बोल्ने वक्ताहरुले प्रतिनिधिसभा विघटन असंवैधानिक र प्रतिगामी कदम भन्दै चर्को विरोध गरेका थिए ।

तस्बिर : हरिशजंग क्षेत्री/बाह्रखरी