site stats
बाह्रखरी :: Baahrakhari
सम्पादकीय
Global Ime bankGlobal Ime bank
उखु किसानलाई फेरि धोका नहोस् ! 

आफ्नो बालीको बक्यौता उठाउन धर्ना दिने उखु किसानहरू पैसा भुक्तानी गराइदिने सरकारी आश्वासन पत्याएर घर फर्कन तयार भएका छन् । न्यानो तराईबाट मीनपचासको ‘पानी जम्ने’ चिसोमा संघीय राजधानी काठमाडौं आएर उखु किसानहरू दुई सातादेखि कठ्यांग्रिँदै सडकमा धर्ना बसेका थिए । धर्ना दिनेमध्येका एक किसानको भने काठमाडौंमै मृत्यु भएको छ । किसानहरूका अनुसार चिनी कारखानाका मालिकहरूसँग किसानले उखु बालीको ९० करोड रुपियाँ भुक्तानी लिन बाँकी छ । हिजो सोमवार उद्योग वाणिज्य तथा आपूर्ति मन्त्रालयमा भएको वार्तामा २१ दिनभित्र ६६ करोड उठाइदिने र बाँकी रकमका हकमा चार महिनाभित्र छानबिन गरी सबै रकम चुक्ता गराउने सहमति भएको हो । सर्लाही, रौतहट, नवलपरासी, कपिलवस्तुलगायतका तराईका जिल्लाबाट काठमाडौं आएका किसानहरूले बक्यौता रकम दिलाउन माग गर्दै धर्ना दिएका थिए । 

किसानहरूको समस्याप्रति गम्भीर र संवेदनशील नभएको आरोप सरकारी अधिकारीहरूमाथि लाग्दैआएको छ । गएको वर्ष पनि सरकारले उखु किसानलाई बक्यौता रकम उठाइदिने आश्वासन दिएर घर फर्काएको थियो । तर, किसानहरूसँग गरेको सम्झौता पालन गर्न सरकारी अधिकारीहरू इमानदार भएनन् । साथै, केही चिनी कारखाना सञ्चालकहरू पनि किसानप्रति इमानदार हुन सकेनन् । सरकारी अधिकारीहरू र चिनी कारखाना सञ्चालकहरूबीच कुनै न कुनै प्रकारको मिलेमतो वा साँठगाँठ भएका कारण नै किसानहरू मर्कामा पर्दा सरकारले आडभरोस नदिएको हुनुपर्छ । अहिले पनि सरकारी हिसाबमा किसानहरूले दाबी गरेका बक्यौता ९० करोडभन्दा निकै कम रकम ६६ करोडमात्र भुक्तानी हुन बाँकी रहेको देखिएको छ । किसानहरू ‘जो हात सो साथ’ गर्ने मनःस्थितिमा पुगेका देखिए । किसानहरू घर फर्केपछि कर्मचारीले तिनको फाइल घर्रामा थन्क्याएर बिर्सिदिएको बहाना गर्ने जोखिम अहिले पनि पोहोरजत्तिकै छ । गएको वर्ष पनि यसरी नै सम्झौता गरेर किसानहरूलाई बक्यौता रकम उपलब्ध गराउने वाचा सरकारी अधिकारीहरूले गरेका थिए । तर, किसानहरूलाई धोका भयो । काठमाडौं आएर सडकमा फेरि धर्ना बस्नुपर्यो । धर्ना बसेका किसानमध्ये एकजनाको ज्यानै गयो ।

उखु किसानहरूले भोगेको सास्ती र मानवीय क्षतिको भने पक्कै पनि कतै हिसाब हुँदैन । यस्तै धर्नामा कुनै राजनीतिक दलको कार्यकर्ताको ज्यान गएको भए सहिद घोषणा र परिवारलाई क्षतिपूर्तिको माग गर्दै अर्को आन्दोलन हुनसक्थ्यो । सरकारी अधिकारीहरूको प्रवृत्ति बदलिएन भने किसानहरूले अर्को वर्ष पनि बक्यौता उठाइदिने माग गर्दै आन्दोलन गर्नुपर्नेछ । त्यस अवस्थामा उनीहरूका मनमा सरकारप्रति मात्र होइन राज्यप्रति नै वितृष्णा र आक्रोश उत्पन्न हुनसक्छ । यसैले किसानहरूलाई फेरि धोका नहोस् भन्नेमा सरकार, चिनी कारखाना सञ्चालक र राजनीतिक दलहरू इमानदार होऊन् । यस्तै, चिनी कारखाना सञ्चालकहरूसँग सरकारले धेरै कडाइ गर्न खोज्यो भने उनीहरूले अरू उपाय अपनाउनेछन् । यसैले किसानहरूलाई फेरि धोका नदिने हो भने अहिले उनीहरूले पाउनुपर्ने रकम सरकारले उपलब्ध गराएर चिनी कारखानाबाट सरकारले शोधभर्ना लिने विधि अपनाउनु उचित हुन्छ । यसो गरिएमा चिनी कारखानाहरू बन्द गर्ने वा बेच्ने बाध्यता कारखाना सञ्चालकहरूलाई पनि हुनेछैन ।

प्रकाशित मिति: मंगलबार, पुस १४, २०७७  १६:३४
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
सरकारले तत्काल सम्बोधन गरोस् !
सरकारले तत्काल सम्बोधन गरोस् !
Hamro patroHamro patro