एजेन्सी । भारतका विदेश सचिव हर्षबर्द्धन शृङ्गला मंसिर ११ गते दुईदिने भ्रमणका लागि नेपाल आउने भारतीय मिडियामा खबर आए पनि नेपालको परराष्ट्र मन्त्रालयले भने यसबारेमा औपचारिक जानकारी नभएको बताएको छ । भारतीय मिडियामा सोमबार औपचारिक वार्ताका लागि विदेश सचिव काठमाडौँ जाने भन्दै समाचार प्रकाशित भएका थिए ।
दुई देशबीचको सम्बन्धमा सुधार ल्याउने प्रयास अन्र्तगत नयाँ दिल्लीले यस्तो गर्न लागेको समाचारमा जनाइएको छ । तर परराष्ट्रमन्त्री प्रदीप ज्ञवालीले बाह्रखरीसँग संक्षिप्त कुरा गर्दै भारतीय विदेश सचिव आउने बारेमा कुनै औपचारिक जानकारी नभएको बताए ।
“त्यस्तो कुनै औपचारिक कार्यक्रम र निर्णय भएको छैन,” उनले भने ।
स्रोतका अनुसार परराष्ट्र मन्त्रालयले पनि भारतीय मिडियामा समाचार सार्वजनिक भएपछि उनी नेपाल आउन लागेको जानकारी पाएको थियो । दुई देशबीच बैठक भए दुवैपक्षले तय गर्ने प्रचलन भए पनि अहिले त्यस्तो कुनै औपचारिक कार्यक्रम नभएको परराष्ट्र स्रोतले जानकारी गराएको छ ।
विदेश सचिव पठाउने निर्णय भारतीय सेनाका प्रमुख जनरल एमएम नरभानेको भ्रमणको केही दिनपछि नै सार्वजनिक भएको छ । यसअघि नरभानेले प्रधानमन्त्री केपी शर्मा ओलीसँग भेट गरि नेपाल भारतबीचको लामो सम्बन्ध कायम राख्न सबै समस्याहरु वार्ता र छलफल मार्फत समाधान गर्ने निष्कर्षमा पुग्नुपर्ने बताएको हिन्दुस्तान टाइम्सले जनाएको छ ।
उनको नेपाल भ्रमणलाई भारतसँगको कूटनीतिक सम्बन्धका हिसाबले अधिक महत्वपूर्ण मानिएको थियो । उत्तराखण्डस्थित सिमानामा निर्माण गरिएको सडक सम्बन्धी नेपाल सरकारले विरोध जनाउँदा भारतको पक्षबाट त्यसको प्रतिक्रिया दिने उनी पहिलो भारतीय उच्च अधिकारी थिए ।
उनै नरभाने नेपालको औपचारिक भ्रमण सकेर भर्खरमात्रै फर्किएका छन् ।
नोभेम्बर २६ र २७ का दिन तय भएको भनिएको भारतीय विदेश सचिवले परराष्ट्रमन्त्री प्रदीप ज्ञवालीसँग पनि वार्ता गर्ने भारतीय मिडियामा प्रकाशित समाचारमा जनाइएको छ । तर ज्ञवालीले बाह्रखरीसँग कुरा गर्दै भ्रमणका बारेमा औपचारिक जानकारी नभएको बताए ।
प्रकाशित समाचारअनुसार विदेश सचिवले राष्ट्रपति विद्यादेवी भण्डारी र प्रधानमन्त्री केपी शर्मा ओलीसँग वार्ता गर्ने तयारी छ ।
औपचारिक भेटवार्ताको कार्यक्रममा शृङ्गलाले पनि सिमाना विवादमै केन्द्रित रहेर छलफल गर्ने भारतीय मिडियामा प्रकाशित समाचारमा उल्लेख छ । यो भ्रमणलाई कोरोना भाइरसको खोप आपूर्ति सम्बन्धी भारतले नेपाललाई मद्दत गर्ने प्रतिबद्धताका हिसाबले पनि महत्वपूर्ण रुपमा पनि हेरिएको छ ।
शृङगलाको मावल ललितपुरको पाटनमा रहेकाले पनि उनले नेपाल भारतबीच सम्बन्ध सुधारमा सकारात्मक भूमिका निर्वाह गर्न सक्ने अनुमान छ ।