काठमाडौं । पार्टीभित्रको विवाद उत्कर्षतिर अभिमुख हुँदै जाँदा प्रधानमन्त्री केपी शर्मा ओली पक्षले गोप्य भेलाको आयोजना गर्न थालेको छ । कोरोना सङ्क्रमणको जोखिमका कारण ओली पक्षले जुम मिटिङमार्फत् आफ्ना कुरा राख्न थालेको हो ।
स्रोतका अनुसार ओली समूहले बुधबार प्रदेश नम्बर एकको कमिटी स्तरीय भेला आयोजना गरेको थियो । भेलामा १७ जना नेताहरुले पार्टीको पछिल्लो विवादबारे जिज्ञासा राखेका थिए ।
भेलामा प्रधानमन्त्री केपी शर्मा ओली र भर्खरै प्रधानमन्त्री कार्यालय हेर्नेगरी जिम्मा पाएका उपप्रधानमन्त्री ईश्वर पोखरेलले सम्बोधन गरेको खुलासा भएको छ । सम्बोधनका क्रममा पोखरेलले प्रदेश नम्बर एकका सबै जिल्ला र निर्वाचन क्षेत्रमा मदन भण्डारी फाउन्डेसन सक्रिय तुल्याउन निर्देशन दिएका थिए ।
बाह्रखरीले फेला पारेको पोखरेलको निर्देशनात्मक मन्तव्यमा उनले भनेका छन्, “मदन भण्डारीका विचारहरूको योगदानका बारेमा देशभरका कम्युनिस्ट कार्यकर्ताहरू र आम जनतालाई पनि बताउने बुझाउने काम हाम्रो कर्तव्य हो । त्यो कर्तव्यबाट किञ्चितरूपले मात्रै पनि हामी पछि पर्ने छैनौं । त्यसमा मदन भण्डारी फाउन्डेसनले अगुवाइ गरेर काम गरोस् । त्यसमा साथीहरू पनि सहभागी हुनुपर्छ । अरू साथीहरूलाई पनि यसमा ल्याउनुपर्छ । यसको मुख्य उद्देश्य अन्यथा गर्ने होइन । मदन भण्डारीका विचार के हुन् ? जनताको बहुदलीय जनवादले भन्न खोजेको कुरा के हो ? मदन भण्डारीले देशलाई पुर्याउनु भएको योगदान के हो ? यो कुरा हामीले बताउने छौं । यो बताउने कुरालाई कसैले पनि रोकछेक गर्न सक्दैन । यस किसिमको योजना बनाएर फाउन्डेसन अघि बढोस् ।”
पोखरेलको निर्देशन २६ गते सकिएको स्थायी कमिटी बैठकको निर्णयविपरीत हो । स्थायी कमिटी बैठकले नेताहरूको नाममा खुलेका प्रतिष्ठानहरूलाई नियमन गर्ने निर्णय गरेको थियो ।
“पार्टीका विभिन्न नेताका नाममा विभिन्न प्रष्ठिान वा संघ÷संस्थाहरू परिचालित छन् । यी मध्ये अधिकाङ्श गुटबन्दीको माध्यम बन्दै गएका छन् । गुटबन्दी रोक्न प्रतिष्ठानहरूलाई नियमन गर्न जरुरी छ । त्यसका लागि निम्नानुसार गर्ने :
पार्टीले यस्ता संस्थाहरूमा नेता वा कार्यकर्ताको संलग्नता र तिनको आर्थिक स्रोत तथा क्रियाकलापका बारेमा तथ्यपरक जानकारी प्राप्त गर्ने । त्यस्ता संस्थाहरूमा पार्टीका नेता, कार्यकर्ता वा सदस्यहरूको संलग्नताको स्वरूप निश्चित गर्ने । सचिवालयले प्रतिष्ठानहरूको सञ्चालन, व्यवस्थापन तथा नियमन विधि निश्चित गर्न स्पष्ट कार्यादेशसहित कार्यदल गठन गर्ने । कार्यदलको प्रतिवेदन प्राप्त भएपश्चात् त्यसउपर छलफल गरी आवश्यक निर्णय लिने । तबसम्मका लागि पार्टीद्वारा गठित वा पार्टीका नेता कार्यकर्ता सम्मिलित कुनै पनि प्रष्ठिानहरूलाई प्रदेश, जिल्ला र स्थानीय तहमा शाखा गठन नगर्न र गतिविधि नगर्न निर्देशन दिने,” स्थायी कमिटीको बैठकपछि सर्कुलर गरिएको अन्तरपार्टी निर्देशनमा भनिएको छ ।
पोखरेलले भेलामा जनताको बहुदलीय जनवाद नै पार्टीको विचार हुनुपर्ने धारणा राखेका थिए । नेकपा अहिले विचारमा प्रष्ट नभएको र त्यसको पूर्ति जबजले मात्रै गर्न सक्ने उनको भनाइ थियो । “विचारमा प्रष्ट भइएन भने हामी ठीक ढङ्गले अघि बढ्न सक्दैनौं । यो विचारमा स्पष्टताको कुरा गरिरहँदा हाम्रो विचार जनताको बहुदलीय जनवादबाट निर्देशित हुने हाम्रो निष्कर्ष हो, त्यसलाई कहिले नि कमजोर ढङ्गले समात्न हुँदैन । अहिलेको पार्टी एकतापछि केही समयका लागि हामीले वास्तवमा महाधिवेशनसम्मका लागि अन्तरवस्तुमा जनताको बहुदलीय जनवाद रहे पनि जनताको जनवाद बोकेका हौं । साँचो कुरा के हो भने आज हामी निर्देशित भएको विचार जनताको बहुदलीय जनवाद नै हो । त्यही कुरालाई समातेर हामी अगाढि बढ्छौं ।”
पूर्वएमालेका कतिपय नेताले भेलामा पार्टी एकता नै गलत भएको पनि निष्कर्ष निकालेका थिए । त्यसको जवाफ पनि पोखरेलले दिएका छन् । उनले देशभरिको चाहना सम्बोधन गर्न एकता गरेको बताएका थिए । “कार्यकर्ताको चाहना पनि दुईवटा कम्युनिस्ट पार्टी मिलोस् भन्ने थियो,” पोखरेलले भनेका थिए, “जनताको चाहना पनि त्यही थियो । मुलुकले राजनीतिक अस्थिरता भोग्दै आएको थियो । प्रगतिशील, वामपन्थी शक्ति एकताबद्ध भएर राजनीतिक स्थायीत्व दिने राष्ट्रिय आवश्यकता पूरा गरेका हौं ।”
भेलामा उनले अहिले नै एकता नभत्कने पनि बताएका थिए । त्यस्तै गोप्य जुम भेलामा पोखरेलले कर्णाली प्रदेशको सन्दर्भमा त्यहाँका ओलीनिकट नेताहरूले प्रधानमन्त्री र सम्बन्धित नेताहरूसँग सरसल्लाह नै नगरेको पनि बताएका छन् ।
मन्त्रिपरिषद् हेरफेरका सन्दर्भमा पनि पोखरेलले प्रष्ट पारेका थिए । पार्टी अध्यक्ष प्रचण्डले आफूले चाहेका केही मन्त्री हटाउन नपाएपछि एकलौटी गरेको भन्ने आरोप लगाएको पनि बताएका थिए । उनले अब पुनर्गठन हुँदा दुईवर्ष अवधि पुगेका प्रायः हटाइने पनि जानकारी दिए । छिट्टै पुनर्गठन हुने उनको सङ्केत थियो ।