काठमाडौं । लुक्ला विमानस्थल अनिश्चितकालका लागि उडान बन्द गरिएको छ । सोलुखुम्बुको खुम्बु पासाङल्हामु गाउँपालिकाले कात्तिक ७ गतेदेखि अनिश्चितकालसम्म लुक्लामा पर्यटक नल्याउन निर्देशन दिएको हो ।
कोरोना भाइरस संक्रमण बढेको भन्दै गाउँपालिकाले सबै हेलिकप्टर कम्पनी, तारा, समिट र सीता एयरलान्सलाई पत्र लेखेर कात्तिक ७ देखि अनिश्चितकालसम्म पर्यटक नल्याउन आग्रह गरेको हो ।
गाउँपालिकाका स्थायी बासिन्दा, राष्ट्रसेवक कर्मचारी र शिक्षकबाहेक अरुले प्रवेश गर्न नपाउने गाउँपालिकाले जारी गरेको पत्रमा जनाइएको छ । तर गाउँ आउने स्थानीय बासिन्दा, शिक्षक, कर्मचारीले ७२ घण्टाभित्र पीसीआर रिपोर्ट नेगेटिभ ल्याउनुपर्ने पनि जनाएको छ ।
कोरोना भाइरस संक्रमण फैलिन नदिन गाउँपालिकाभित्रका होटल तथा लज पनि बन्द गरिएको गाउँपालिकाले जनाएको छ ।