काठमाडौं । नेपाल सरकार मन्त्रिपरिषद्बाट हालै नेपाली नागरिकलाई स्वदेश फर्कन सहजीकरण गर्नेसम्बन्धी कार्यविधि स्वीकृत भई विदेशमा रहेका नेपालीहरूलाई स्वदेर्श फिर्ता गर्ने तयारी हुँदैछ ।
नेपाल फर्कन चाहनेको लागि विवरण संकलन कार्य भइरहेको छ । आबुदाबीमा रहेको नेपाली राजदूवासले एक पटक फाराम भरिसकेपछि पटक-पटक फाराम भर्नु नपर्ने बताएको छ । साथै थप विवरण आवश्यक भएमा टेलिफोन र ईमेल मार्फत माग गरिने आबुदाबीस्थित नेपाली दूतावासले जनाएको छ ।
नेपाल आउनुअघि गरिने कोभिड–१९ परीक्षणका लागि दूतावासले यूएई सरकारसँग समन्वय गरी मिति, स्थान र समयका बारेमा उपयुक्त समयमा जानकारी गराउने जनाएको छ ।
यूएई सरकारले मार्च १ पछि समाप्त भएको भिसाको म्याद डिसेम्बर २०२० सम्मका लागि स्वतः नवीकरण गर्ने जनाएको छ । मार्च १ पछि भिसा समाप्त भएकाहरूका लागि पनि जुन १ बाट लागु हुने गरी ३ महिनाभित्र स्वदेश फर्केमा सम्पूर्ण जरिवाना मिनाहा गर्ने जनाइएको छ ।
दूतावासको टेलिफोन नम्बर, ईमेल ठेगाना र फेसबुक पेजमार्फत नेपालीहरुको गुनासा एवं जिज्ञासाहरू सुन्नको लागि दूतावासले सम्पर्क व्यक्ती तोकेको छ ।
गर्भवती महिला, कोभिड बाहेकका बिरामी, आफन्त गुमाएकाहरू, विद्यार्थी र इन्टर्नसिपको लागि रीता धिताललाई दूतावासको फोन नम्बर ०५०८१८० २८० मार्फत सम्पर्क गर्न सकिने जनाइएको छ ।
व्यक्तिगत तथा कम्पनी भिसा, भिजिट भिसा, यूएई रहेकाले निर्मला थापा र मोतिराम भुसाललाई सम्पर्क गर्न सकिने जनाइएको छ । यस्तै पासपोर्ट र प्रमाणीकरणको लागि नारायण ज्ञवाली ०५८९०९ ५४०४ मा सम्पर्क गर्न सकिने बताइएको छ ।