बेइजिङ । अमेरिकी अधिकारीहरुको चीनले नोभेल कोरोना भाइरसका संक्रमित र मृत्युको तथ्यांक लुकाएको भन्ने टिप्पणीप्रति चीनले कडा प्रतिक्रिया दिएको छ ।
चिनियाँ विदेश मन्त्रालयले बिहीबार भन्यो, " कोरोना भाइरससम्बन्धी चीनले गरेको तथ्यांकको रिपोर्टिङ्मा शंका व्यक्त गर्दै अमेरिकी अधिकारीहरुले गरेको टिप्पणीहरु 'लज्जास्पद' छन् ।
चिनियाँ विदेश मन्त्रालयका प्रवक्ता हुआ चुङयिङले नियमित ब्रिफिङका क्रममा भनिन्, "कोरोना भाइरस प्रकोपका विषयमा चीन खुला र पारदर्शी छ ।"
अमेरिकालाई स्वास्थ्यजस्तो संवदेनशील विषयमा राजनीति नगर्न र आफ्ना जनताको सुरक्षामा ध्यान दिन चीनले आग्रह गरेको छ ।
यसअघि बुधबार ब्लुमबर्गलाई उदृत गर्दै तीन अमेरिकी अधिकारीहरुले अमेरिकी खुफियाले बुझाएको रिपोर्ट अनुसार चीनमा कोरोनाका कारण मृत्यु भएको तथ्यांक अपुरो भएको बताएका थिए ।
चीनमा मृत्यु भएका मानिसहरुको दाहसंस्कार गर्ने ठाउँ नपाएर लाइन लगाइएकोसमेत टिप्पणी गरिएको थियो ।
फ्रान्सका लागि चिनियाँ राजदूत लु साइले भने, "मार्च २३ सम्म सम्पूर्ण चिनियाँ शवगृहहरु पनि बन्द भएकाले अहिले लाइन देखिएको हो । जनवरी २३ देखि वुहानमा लकडाउन घोषणा गरिएपछि मानिसहरुको आवतजावत नै बन्द भएको थियो ।"
उनका अनुसार सन् २०१९ मा वुहानमा ५१ हजार २०० को मृत्यु भएको र औसतमा महिनामा चार हजारको मृत्यु हुनेको गरेको छ । अन्य वर्षको तुलनामा जनवरी र फेब्रुअरीमा कोरोना भाइरसका कारण उक्त संख्या बढेको हो ।
बुधबारसम्म चीनमा तीन हजार १९९ कोरोना संक्रमितको मृत्यु भएको छ । जसमा दुई हजार ५५९ जना वुहानका रहेको बताइएको छ । अमेरिकामा भने कोरोना भाइरसका कारण करिब पाँच हजारको मृत्यु भइसकेको छ । - रोयटर्स र साउथ चाइना मर्निङ पोस्ट
