बेइजिङ । चीनले एक कोरोना संक्रमितको उपचारका लागि दुई हजार ३९५ अमेरिकी डलर अर्थात् करिब १७ हजार युआन खर्च गरेको जनाएको छ । करिब ६५ प्रतिशत कोरोना संक्रमितको उपचार गरिसकेको चीनले उक्त रकम चीनको स्वास्थ्य सुरक्षा प्रणालीबाट खर्चिएको र बाँकी रकम स्थानीय सरकारी कोषले सहयोग गरेको ग्लोबल टाइम्सले जनाएको छ ।
मार्च १५ सम्ममा कोरोना संक्रमित र आशंकित गरी ९३ हजार २३८ मेडिकल बिल अर्थात् एक बिलियन ४० मिलियन अमेरिकी डलर (एक बिलियन युआन) चुक्ता गरिएको बताइएको छ । केही मानिसहरु एकभन्दा बढी पटक कोरोना जाँचका लागि आएकोसमेत जनाइएको छ । चिनियाँ नेसनल हेल्थकेयर सेक्युरिटी एड्मिन्सट्रेसनका वरिष्ठ अधिकारी सीओङ सीआनजुनका अनुसार करिब ६५ प्रतिशतको उपचार खर्च स्वास्थ्य सुरक्षा प्रणालीमार्फत चुक्ता गरिएको छ ।
त्यसैगरी ४४ हजार १८९ कोरोना संक्रमितहरुले आफ्नो ६५ प्रतिशत बिल स्वास्थ्य सुरक्षा प्रणालीमार्फत् चुक्ता गरेको र ३५ प्रतिशत स्थानीय सरकारको सहायता कोषमार्फत् चुक्ता गरेको जनाइएको छ । सीओङले भने, "एक बिरामी बराबर करिब १७ सय युआन खर्च भएको छ ।"
मुलुकभरका मेडिकल इन्स्टिच्युटका लागि स्वास्थ्य सुरक्षा प्रणालीले करिब १९.३ बिलियन युआन छुट्याएको जानकारी दिइएको छ । जसमध्ये ३.७ बिलियन युआन कोरोना भाइरसको इपिसेन्टर रहेको हुबेइमा पठाइएको थियो ।
चीनले फेब्रुअरीको सुरुआतमै कोरोना संक्रमितको उपचारमा अपुग रकम स्थानीय सरकारको सहायता कोषले चुक्ता गर्ने घोषणा गरेको थियो ।
यद्यपि, अमेरिकामा भने फरक आँकडा आएको छ । अमेरिकामा हरेक कोरोना संक्रमितको उपचारमा फरक-फरक खर्च भएको जनाइएको छ । अमेरिकामा संक्रमितलाई कस्तो लक्षण देखिएको छ र संक्रमितको बिमा थियो कि थिएन भन्ने कुराका आधारमा फरक-फरक खर्च लाग्ने गरेको मार्च २२ मा प्रकाशित वाल स्ट्रिट जर्नलले जनाएको छ ।
कुनै कर्मचारी स्वास्थ्य बिमा योजना अन्तर्गत उपचार गरिएका कोरोना संक्रमितको निमोनियाको उपचारमा करिब २० हजार अमेरिकी डलर खर्च हुने गरेको र अन्यमा १३ सय अमेरिकी डलर औसतमा खर्च हुने गरेको जनाइएको छ । कुनै जटिलता नभएको र सामान्य लक्षण भएको कोरोना संक्रमितको उपचारका लागि औसतमा ९ हजारसम्म खर्च हुने गरेको र औसतमा प्रति बिरामीको उपचारमा १ हजार ४६४ अमेरिकी डलर खर्च भइरहेको वाल स्ट्रिट जर्नलको तथ्यांकले जनाएको छ ।
कोरोना संक्रमण छ कि छैन भनेर गरिने न्युक्लिक एसिड परीक्षण नि:शुल्क हुने गरेको छ । - ग्लोबल टाइम्स
