काठमाडौं । भारतबाट फर्किएका नेपालीहरु नेपाल-भारत सीमाको दशगजा क्षेत्रमा अलपत्र परेका भए पनि गृह मन्त्रालयले भने उनीहरुलाई नेपाल ल्याउने विषयमा कुनै प्रबन्ध नभएको बताएको छ ।
गृह मन्त्रालयका सूचना अधिकारी उमाकान्त अधिकारीले बाह्रखरीसँग कुरा गर्दै सीमा नाका बन्द हुँदाहुँदै आएकाहरुलाई नेपाल ल्याउने कुनै प्रबन्ध नभएको गैरजिम्मेवारपूर्ण जवाफ दिए ।
उनले बाह्रखरीसँग भने, "सीमा नाका बन्द हुँदाहुँदै आएकाहरुलाई अलपत्र परेको भन्न मिल्दैन । सीमा नाका बन्द भइसकेको छ । उनीहरुलाई नेपाल ल्याउने विषयमा कुनै प्रबन्ध मिलाइएको छैन ।"
भारतका विभिन्न ठाउँबाट नोभेल कोरोना भाइरसको त्रास र नेपालीहरुको नयाँ वर्ष मनाउन स्वदेश फर्किएका ३०१ जना नेपालीहरु कञ्चनपुरको गड्डाचौकीभन्दा पारीको १० गजा क्षेत्रमा अलपत्र परेका छन् । जसमध्ये दुई गर्भवतीसहित ४९ महिला र बालबालिका छन् ।
भारतको उत्तराखण्ड राज्यमा जनता कर्फ्यु मार्च ३१ सम्म जारी भए पनि बाटोमा उनीहरु अलपत्र पर्नसक्ने भन्दै बनबासाबाट नेपालतर्फ पठाइए पनि नेपालमा भने आफ्नै जनतलाई आउन रोक लगाइएको छ । नेपाल सरकारको मन्त्रिपरिषद्को आइतबार राति बसेको बैठकले भारत-चीनसँगका नाकाहरु बन्द गर्ने निर्णय गरेको थियो । सोही निर्णयबमोजिम आजैदेखि सीमा नाकाहरु सिल गरिएका छन् भने कञ्चनपुर 'लकडाउन'को स्थितिमा छ ।
सीमा नाका बन्द हुँदा दशगजामा अलपत्र नेपाली
सरकारले गन्तव्यका लागि हिडिसकेकाहरुलाई गन्तव्यमा पुग्न लाग्ने समयसमेत नदिएर सीमा नाका बन्द गरेको हो । कञ्चनपुरमा प्रमुख जिल्ला अधिकारी नूरहरि खतिवडाले भने सीमा नाका बन्द गर्ने केन्द्रको निर्देशन भएकोले उनीहरुलाई आउने दिने विषयमा आफूले केही गर्न नसक्ने स्वीकार गरे ।
उनीहरुलाई नेपाल ल्याउने विषयमा अहिलेसम्म कुनै निर्णय नभएको कञ्चनपुरका सीडीओ खतिवडाले जानकारी दिए । उनले बाह्रखरीसँग भने, "सरकारले सीमा नाका बन्द गर्ने घोषणा गरेको छ । सोमबार बिहान १० बजेसम्म सीमामा आएकाहरुलाई नेपाल प्रवेश गर्न दिएका छौं । उनीहरुको विषयमा के गर्ने भन्ने विषयमा हामीले निर्णय गर्ने अधिकार छैन । गृहमन्त्रालयको आदेश चाहिन्छ । हामी गृहको आदेश कुरिरहेका छौं ।"
सरकारले ढिलो गरी निर्णय लिएको र आवतजावतका लागि समय नदिएको हुँदा यस्तो समस्या उत्पन्न भएर आफू अलपत्र परेको दशगजामा बसेका नेपालीहरुको गुनासो छ ।