काठमाडौं । अमेरिकी विदेश मन्त्रालयले तयार पारेको मानव बेचबिखनसम्बन्धी २०१९ को प्रतिवेदनमा नेपाल सरकारले अघिल्लो वर्षभन्दा तुलनात्मक रुपमा बचबिखन रोक्न बढी पहल गरेको चर्चा गरिएको छ ।

काठमाडौंस्थित अमेरिकी दूतावासले जनाएअनुसार विश्वभरीका १८७ देशमा मानव बेचबिखन नियन्त्रण र नियमनसम्बन्धी विषय सो रिपोर्टमा उल्लेख गरिएको छ । तर, नेपाल सरकारले न्यूनतम मापदण्ड भने पूरा नगरेको प्रतिवेदनमा उल्लेख गरिएको छ । त्यसतर्फ देखिने गरी प्रयास गरेको रिपोर्टमा उल्लेख छ ।

नेपालमा पछिल्लो पटक बेचबिखनसम्बन्धी मामिलामा ३१३ वटा घटनाको अनुसन्धान गरेको र अघिल्लो वर्ष सो संख्या २२७ वटा रहेको रिपोर्टमा उल्लेख छ । 

३१३ वटा मुद्दामा ५४६ मानिस संलग्न भएको र तिनमा ४४७ जना पक्राउ परेको रिपोर्टमा जनाइएको छ । प्रहरीको सीआइबीले १३ वटा अन्तरदेशीय घटनाको छानबिन गरेको र अप्रिल र डिसेम्बर २०१८को बीचमा १४ जना शंकास्पद व्यक्तिलाई पक्राउ गरिएको जनाएको छ । सरकारले नेपालमा महिलाहरुलाई बेचबिखन हुन नदिन प्रयत्न गरेको जनाइएको छ ।

कतिपय नेपाली महिलाले चीन र दक्षिण कोरियाका पुरुषसँग विवाह गरेकोमा उनीहरुमाथि ठगी भएको उजुरी पनि गरेको अमेरिकी रिपोर्टमा उल्लेख छ । 

श्रीलंकन र बंगलादेशीले पनि नेपाली कागजात प्रयोग गरेर नेपाललाई ट्रान्जिट बनाइ गलत काम गरिरहेको जनाइएको छ । भारतको कोलकाता, चेन्नई विमानस्थलमा कमजोर जाँचका कारण बेचबिखनमा संलग्न व्यक्तिहरुले ती विमानस्थलको प्रयोग गर्ने गरेको समेत रिपोर्टमा उल्लेख गरिएको छ ।

कतिपय नेपाली श्रमिकलाई श्रीलंका र वर्मा हुँदै गन्तव्य मुलुकसम्म लगिने गरेको समेत रिपोर्टमा उल्लेख छ ।

नेपालभित्रै बँधुवा मजदुरको रुपमा मानिसहरु कृषि, इँटा भट्टाजस्ता कार्यमा रहेको जनाइएको छ ।