‘मिस नेपाल युरोप २०२०’ बेल्जियममा हुँदै

‘मिस नेपाल युरोप २०२०’ बेल्जियममा हुँदै

काठमाडौं । बेल्जियममा पहिलोपटक ‘मिस नेपाल युरोप २०२०’ को आयोजना हुने भएको छ । ड्रिम्स नेपाल बेल्जियमको आयोजनामा हुन लागेको प्रतियोगिता जनवरी २६ मा बेल्जिमयको लोवेन सहरमा हुने भएको हो ।

विभिन्न देशमा गरिएको अडिसनका सहभागीबाट छानिएका अन्तिम १२ मध्येबाट एकजना छनोट हुनेछन् । ड्रिम्स नेपालकी संस्थापक तथा एनआरएनए युरोप क्षेत्रीय महिला संयोजक योगिता थापाका अनुसार ‘मिस नेपाल युरोप २०२०’ को विजेताले मिस नेपालको आगामी प्रतियोगितामा सीधै प्रवेश पाउनेछन् । 

प्रतियोगितामा विजेता हुनेले नगद पुरस्कारका साथै क्राउन पाउनेछन् । फस्र्ट तथा सेकेन्ड रनर अपलाई पनि नगद पुरस्कार प्रदान गरिनेछ । त्यस्तै प्रतियोगितामा मिस ट्यालेन्ट, मिस पर्सनालिटी, मिस फोटोजेनिक र मिस कन्फिडेन्टको सब–टाइटल समेत प्रदान गरिनेछ । 

संयोजक थापा आफै युरोपियन मोडलिङ प्रतियोगिताको फाइनलिस्ट हुन् । प्रतियोगिताको कोरियोग्राफर पूर्वमिस नेपाल सुगारिका केसी छन् । डिजाइनर यूबी थापाको पहिरनमा प्रतियोगी प्रस्तुत हुनेछन् ।

बेल्जियमबाट मिला नेपाली, लुना श्रेष्ठ, सबिना नेपाली र ज्योति भट्टलगायत आयरल्यान्डबाट संगीता थापा, अस्ट्रियाबाट सुशीला बोहोरा, फिनल्यान्डबाट निरुषा खत्री, स्विट्जरल्यान्डबाट रोजमेरी भोटिया, नर्वेबाट श्रद्धा थापा, जर्मनीबाट आश्मा घिमिरे तथा सामु पराजुली र फ्रान्सबाट श्रीया भण्डारी फाइनलिस्टका रूपमा चयन भएका छन् ।
 

प्रतिकृया दिनुहोस
ad