काठमाडौं । पश्चिमी वायुको प्रभावले अहिले मुलुकका विभिन्न स्थानमा भारी हिमपात र वर्षा भइरहेको छ ।

“अहिले देशको पश्चिमी भूभागमा बदली भइरहेको छ । वर्षा भइरहेको छ । उच्च हिमाली क्षेत्रमा हिमपात भइरहेको छ । तराइका भूभागमा हुस्सु छ तर घाम लागेपछि कम हुँदै जानेछ,” मौसम विभागले भनेको छ ।

पश्चिमी वायुको प्रभाव शनिबारसम्मै रहने भएकाले विस्तारै पूर्वतर्फ पनि यो असर देखिनेछ ।

मौसमविद् विभूति पोखरेलले जानकारी दिएअनुसार सो प्रणाली आएपछि पश्चिमसहित अन्य क्षेत्रमा हिमपात हुनुका साथै वर्षाको पनि सम्भावना रहेको छ ।

सो प्रणाली आउँदो बुधबारदेखि भने देशैभर फैलिने मौसमविद् पोखरेलले जानकारी गराइन् । 

उनका अनुसार बिहीबार र शुक्रबार पनि त्यसको असर देशैभरी देखिनेछ र आगामी शनिबारदेखि मात्रै मौसममा सामान्य सुधारको अवस्था देखिनेछ ।