नेपाली कांग्रेसका सह–महामन्त्री हुन्, डा. प्रकाशशरण महत । मंसिर १४ गते हुने उपनिर्वाचनमा कांग्रेसका पक्षमा जनताले मत व्यक्त गर्ने उनको विश्वास छ । निर्वाचनमा झुटा आश्वासन र ठूला सपना बाँडे पनि सरकारमा पुगेपछि नेपाल कम्युनिष्ट पार्टीले केही गर्न नसकेको बताउँछन् उनी । भ्रष्टाचार, महँगी र कर बढ्दा जनता सरकारसँग चरम असन्तुष्ट रहेको बताउने महत उपनिर्वाचनमा जनताले कांग्रेसका पक्षमा मत दिएर सरकारलाई सन्देश दिनेमा ढुक्क देखिन्छन् ।
सत्तारुढ दलले निर्वाचन आचारसंहिता उल्लंघन गरेको र राज्यसंयन्त्रको दुरुपयोग गरेको उनको आरोप छ । कांग्रेस सह–महामन्त्री डा. महतसँग उपनिर्वाचनका सन्दर्भमा केन्द्रित रहेर बाह्रखरीका जगन्नाथ दुलालले गरेको संक्षिप्त कुराकानीः
मंसिर १४ गते हुने उपनिर्वाचनलाई नेपाली कांग्रेसले कसरी लिएको छ ?
मंसिर १४ गते ३ वटा प्रदेश सभा, एउटा प्रतिनिधिसभा र एउटा उपमहानगरपालिकामा उपनिर्वाचन हुँदैछ । यो निर्वाचनलाई विशेष रुपमा हेरिएको छ । नेपाली कांग्रेसले पनि उपनिर्वाचनलाई विशेष महत्वका साथ लिएको छ । हामी एकतावद्ध भएर लागेका छौं । हरेक ठाउँमा हाम्रा कार्यकर्ता, शुभचिन्तक कांग्रेसका उमेदवारका पक्षमा निर्वाचन परिणाम ल्याउन क्रियाशिल छन् ।
अहिले उपनिर्वाचन वडा तहदेखि संघीय संसदसम्मको ५० भन्दा बढी ठाउँमा हुँदैछ । जनतामा वर्तमान सरकारको क्रियाकलापबाट चरम असन्तुष्टि छ । मलाई विश्वास छ, जनताले उपनिर्वाचनमार्फत् कांग्रेसलाई जिताएर सरकारलाई त्यसको सन्देश दिनेछन् ।
जनताले कांग्रेसलाई नै मत किन दिने ?
स्थानीय तहदेखि केन्द्रसम्म सत्तारुढ दलसँग जोडिएका व्यक्तिहरुका गतिविधिले लोकतान्त्रिक मूल्य मान्यतालाई बढावा दिने परिवेश देखिएन । जनताले पाउने सेवा सुविधामा पनि पार्टीगत आस्थाका आधारमा भेदभाव देखियो । देशलाई एउटा दृष्टिकोणका साथ अघि बढाउने कुरामा पनि सरकार असफल देखियो । सतही, उडन्ते र हुन नसक्ने कुरामा सपना बाँड्ने काममात्र भयो । गहिराइमा पुग्ने काम भएन । जसले गर्दा जनता सरकारको झुटा आश्वासन सुन्दा सुन्दा आजित भइसकेका छन् । जनताले उपनिर्वाचनमार्फत् आफूलाई झुक्याउने, सपना मात्र बाँड्ने सरकारको गलत रबैयाका विरुद्धमा मत दिनेछन् ।
यद्यपि, यो उपनिर्वाचनले सरकार बन्ने या सरकार रहने, नरहनेमा असर गर्ने होइन । तथापि, आश्वासन र ठूलो सपना बाँडेर कम्युनिष्ट पार्टीको नेतृत्व सरकारमा आएको थियो । यो दुई वर्षमा उहाँहरु पूरै असफल हुनुभएको छ । जनताको मर्म र भावनाको प्रतिनिधित्व गर्न सक्नुभएको छैन । भ्रष्टाचार संस्थागत भएको छ । व्यापक मूल्यवृद्धि भएको छ । करवृद्धि भएको छ । गैरकानुनी क्रियाकलापहरु बढेको छ । राष्ट्रियताको नारा नारामै सीमित भएको छ । व्यवहारमा कतै पनि देशको स्वार्थ र आवश्यक्तालाई केन्द्रविन्दुमा राखेर काम हुन नसकेको स्पष्ट, छर्लंग एउटा तस्विर देखिएको छ । जनताले यसलाई महसुस पनि गरिराखेका छन् । यो परिप्रेक्ष्यमा उपनिर्वाचन हुँदैछ । हाम्रो अपेक्षा छ, जनताले कांग्रेसका उमेदवारलाई जिताउनेछन् । सरकारलाई एउटा सन्देश दिनेछन् । सकारात्मक परिणामको अपेक्षा गरेका छौं ।
सत्तारुढ दलले निर्वाचन आचारसंहिता उल्लंघन गर्यो भन्दै कांग्रेसले छानविनका लागि अनुमगन समिति नै बनाएको छ । तपाईंहरुको आशंका निर्वाचनमा सत्ताको दुरुपयोग भन्ने हो ?
सरकारका तर्फबाट आचारसंहिताको व्यापक उल्लंघन भएको छ । बाग्लुङमा हेलिकप्टर पठाएरै बागी उमेदवारलाई उमेदवारी फिर्ता गराउनका लागि ल्याउने काम भयो । निर्वाचन आयोगले उपनिर्वाचन घोषणा गरिसकेपछि कर्मचारी र सुरक्षा निकायमा हेरफेर गर्न पाइँदैन । उहाँहरुले जहाँ जहाँ निर्वाचन हुँदैछ, त्यहाँ व्यापक रुपमा हेरफेर गर्नुभएको छ । राज्यको साधन, स्रोत, प्रभाव सबै उपनिर्वाचनमा खन्याउने काम गर्नुभएको छ । सरकारी संयन्त्रको दुरुपयोग गर्न नपाउने आचारसंहिता छ । यो कहीँकतै पनि पालना भइरहेको छैन । त्यसैले हाम्रो पार्टीले अनुगमन गर्नका लागि समिति पनि बनाएको छ । हामीले निर्वाचन आचारसंहिता उल्लंघन गर्ने र चुनाव प्रभावित गर्ने मनसायले राज्य संयन्त्रको दुरुपयोग गर्ने कुरालाई गम्भीर रुपमा लिएका छौं ।
सत्तारुढ दल नेपाल कम्युनिष्ट पार्टीले निर्वाचनमा पराजय व्यहोर्नुपर्ला भन्ने डरले राज्य संयन्त्रको दुरुपयोग गर्दै भन्ने तपाईंहरुको विश्लेषण हो ?
अहिले सरकारलाई जनताले विश्वास गर्न छाडेका छन् । जनताको विश्वास गुमाएको अवस्थामा सत्तारुढ दल नेकपा छ । त्यसैले कुनै पनि माध्यम प्रयोग गरेर निर्वाचन जित्नुपर्छ भन्ने मानसिकतामा सत्तारुढ दल नेकपा छ । विगतमा कम्युनिष्टलाई मत दिएका मतदाताहरु र केही राम्रो पो गर्छ कि भनेर कम्युनिष्ट पार्टीसँग जोडिएका कार्यकर्ताहरु पनि अहिले खुशी छैनन् । उनीहरु पनि कम्युनिष्ट पार्टी गलत रहेछ भन्नेमा छन् । आचारसंहिताको खिल्ली उडाएर जसरी पनि निर्वाचन जित्नुपर्छ भन्ने मानसिकतामा सरकार छ । यो हामी कदापी स्विकार गर्दैनौं ।
निर्वाचनमा कांग्रेसभित्र अन्तर्घातका घटनाको चर्चा हुने गर्छ । यसपटक अवस्था के छ ?
उपनिर्वाचनका लागि कांग्रेसका कार्यकर्ता, शुभचिन्तक, समर्थक एक भएर पार्टीले उठाएका उमेदवारका पक्षमा उभिएका छन् । पार्टीमा अहिले अत्यन्त सकारात्मक सोच विकास भएको छ । यो राम्रो कुरा हो । निर्वाचनमा मतदान सकिँदासम्म पनि आन्तरिक एकता मजबुत रहनेछ भन्ने मलाई पूर्ण विश्वास छ । स्थानीय तहमा कसको आधार के छ भनेर हेरेरै पार्टीले टिकट दिएको छ । यसपटक कुनै व्यक्तिगत आधारमा नभएर कांग्रेसले लिएको विचार र पार्टीलाई जिताउने काममा पार्टी एकतावद्ध भएको छ ।
अहिले व्यक्तिगत कुरा छैन । जुन विचारका लागि कांग्रेस समर्पित छ । व्यक्तिगत स्वतन्त्रता, कानुनी शासन, त्यसका आधारमा देशमा लगानी वृद्धि हुने, समृद्धि सिर्जना हुने, समृद्धिको समुचित रुपमा आम जनतालाई केन्द्रित गरेर त्यसको उपयोग हुने । कुनै पनि वर्ग समूह समृद्धिको पहुँचबाट बञ्चित नहोस् भन्ने नै हाम्रो विचार हो । त्यसकारण त्यो विचारलाई हामीले बलियो बनाउन जरुरी छ । व्यक्तिगत रुपमा को भयो भएन भन्ने महत्वपूर्ण कुरा होइन । त्यसो भएकाले सम्पूर्ण पार्टी पंक्ति यसपटक कांग्रेस जिताउने अभियानमा लाग्ने अवस्था छ ।