काठमाडौं । सत्तारूढ नेपाल कम्युनिस्ट पार्टी (नेकपा)को सचिवालय बैठक सोमबार बस्दैछ । प्रधानमन्त्री निवास बालुवाटारमा बिहान ९ बजे बोलाइएको बैठकमा नियमित कार्यसूचीमाथि छलफल हुने सचिवालय सदस्य झलनाथ खनालले जानकारी दिए । “पार्टी एकताको थाति रहेका विषयमा नै छलफल हुने छ । समसामयिक राजनीतिक परिस्थितिमा पनि छलफल होला । अतिरिक्त कार्यसूची छैन,” उनले बताए ।

उनले मन्त्रिपरिषद् पुनःगठनको चर्चा चलेको भए पनि आज भने त्यस विषयमा छलफल नहुने उनको भनाइ थियो । “मन्त्रिपरिषद पुनःगठनको हल्ला मैले पनि सुनेको छु । आज  ती विषयमा छलफल होलान् जस्तो लाग्दैन,” उनले भने । त्यस्तै प्रधानमन्त्रीको सचिवालयले पनि आज भारतले नेपाली भूमि आफ्नो नक्सामा समेटेको र एकीकरणकै बाँकी काम छलफल हुने जानकारी दिएको छ ।

मन्त्रिपरिषद् पुनःगठन प्रधानमन्त्रीकै कार्यक्षेत्र भएकाले उक्त अजेण्डा सचिवालयको नबन्ने दाबी छ । आइतबार प्रधानमन्त्री केपी शर्मा ओली र पार्टी अध्यक्ष पुष्पकमल दाहालबीच मन्त्रिपरिषद् पुनःगठनका विषयमा छलफल भएको स्रोतको भनाइ छ । मन्त्रीहरूलाई प्रधानमन्त्रीको सचिवालयजस्तै सामूहिक राजीनामा गराएर पुनःगठनका लागि मार्ग प्रशस्त गर्ने वा केहीलाई थपघट गर्ने विकल्पमा छलफल भए पनि निष्कर्षमा पुगिनसकेको र तत्काल फेरबदलको सम्भावना नरहेको स्रोतले जानकारी दियो ।

“केही मन्त्रीहरूको कार्य सम्पादनप्रति प्रधानमन्त्री सन्तुष्ट हुनुहुन्न । दुई वर्ष हुन लागेकाले पुनःगठनको बेला पनि भयो । प्रधानमन्त्री परामर्शमा हुनुहुन्छ । छिट्टै पुनःगठन हुन्छ,” उपप्रधान तथा रक्षामन्त्री ईश्वर पोखरेलले भने ।

नेकपा संसदीय दलका उपनेता सुवास नेम्वाङ्गले पनि सचिवालयको बैठक बस्ने कुरा आफूले सुनेको तर मन्त्रिपरिषद् तत्कालै पुनर्गठनको सम्भावना बारेमा आफूलाई जानकारी नभएको बताए । ‘‘केही दिनमै मन्त्रिमण्डल पुनर्गठन भइहाल्ला भन्ने मलाई लाग्दैन । तर, प्रधानमन्त्रीको अधिकारको कुरा हो,’’ नेम्वाङ्गले भने । 

संसद् अधिवेशन बोलाउने बेला भएकाले सभामुख छान्नुपर्नेछ । दुई अध्यक्षबीच उपसभामुख शिवमाया तुम्बाहाम्फेलाई राजीनामा गराउने विषयमा पनि छलफल भएको स्रोतले जानकारी दियो । सभामुख, उपसभामुख एउटै पार्टीको हुन नहुने संवैधानिक बाध्यताका कारण तुम्बाहाम्फेलाई राजीनामा गराएर सभामुख आफैंसँग राख्ने तयारीमा छ सत्तारूढ नेकपा ।

सरकारमै रहेका समाजवादी पार्टीले बखेडा झिकिरहेकाले उपसभामुख राष्ट्रिय जनमोर्चालाई दिने तयारीमा नेकपा रहेको पनि स्रोतको भनाइ छ । त्यसो हुँदा उपसभामुख जनमोर्चाकी दुर्गा पौडेलले पाउने छिन् । यी सबै विषय एकमुष्ठ रूपमा टुङ्ग्याउनुपर्ने भएकाले तत्कालै मन्त्रिपरिषद् हेरफेरको सम्भावना नरहेको प्रधानमन्त्रीको सचिवालयले जानकारी दिएको छ ।