काठमाडौं । प्रमुख प्रतिपक्ष दल नेकपा (माओवादी केन्द्र)का नेताहरूले पार्टीका नेता, कार्यकर्ताहरू श्रम र उत्पादनमा जोडिनुपर्ने प्रस्ताव गरेका छन् ।

सोमबारको केन्द्रीय समितिको बैठकमा केन्द्रीय सदस्यहरूले अध्यक्षसहित सबै नेता, कार्यकर्ताहरू श्रम र उत्पादनमा जोडिनुपर्ने प्रस्ताव राखेका हुन् । पार्टी अध्यक्ष पनि महिनामा कम्तीमा तीनपटक श्रम र उत्पादनमा जोडिनुपर्ने प्रस्ताव राखिएको पार्टी प्रवक्ता अग्निप्रसाद सापकोटाले बताए । उनले दण्डहिनताको अन्त्य गर्नुपर्ने, काँठ अभियान चलाउनुपर्ने र विभाग प्रभावकारी बनाउने, सडक र सदनलाई जोड्ने नीतिअनुसार प्रभावकारी बनाउनेबारेमा नेताहरूले आवाज उठाएको बताए ।

पार्टी अध्यक्ष पुष्पकमल दाहाल 'प्रचण्ड'ले प्रस्तुत गरेको राजनीतिक प्रतिवेदन वैज्ञानिक, वस्तुवादी, यथार्थपरक रहेको नेताहरूले बताएको पनि जानकारी दिए ।

उनले भने, "आज अध्यक्षको प्रतिवेदनमाथि ८० जना कमरेडले बोल्नुभयो । सबैको के छ भने स्पष्ट विचार, स्पष्ट राजनीतिक दृष्टिकोणसहित अघि बढ्नुपर्छ भन्ने छ । अध्यक्षसहित सबै नेता, कार्यकर्ताहरू श्रम र उत्पादनमा जोडिनुपर्छ । कम्तीमा पनि महिनामा तीनपल्ट अध्यक्ष पनि जोडिनुपर्छ । दण्डहिनताको अन्त्य गरिनुपर्छ भन्नेछ । काँठ अभियान, विभाग प्रभावकारी बनाउने, सडक र सदनलाई जोड्ने नीतिअनुसार प्रभावकारी बनाउनुपर्छ । संसद् छिटोभन्दा छिटो बोलाउन दबाब गर्नुपर्छ । महाधिवेशन गर्ने कुरामा सबैको सहमति छ । अभियानमा गएर मात्रै महाधिवेशनको कार्यतालिका तोक्नुपर्ने भन्ने अधिकांशको भनाइ छ । प्रतिवेदन वैज्ञानिक, वस्तुवादी, यथार्थपरक छ भन्नेकुरा उठाउनुभएको छ । पहिचानबारे सशक्त कुरा उठेको छ । स्वायत्तताबारे पनि सशक्त कुरा उठेको छ ।"

बैठकमा नेताहरूले स्थानीय तहलाई अधिकार दिनुपर्ने कुरामा आवाज उठाउन जोड दिएको बताए ।