काठमाडौं । गायक दुर्गेश थापाले ‘ह्याप्पी तिहार चिसो बियर’ बोलको गीत युट्युबाट हटाएका छन् । उनको गीतले समाजमा विकृति फैल्याउन मद्दत गरेको भन्द्र प्रहरीमा उजुरी परेपछि उनले गीत हटाएका हुन् । आफ्नै युट्युब च्यानलबाट अपलोड गरेको गीत अहिले दुर्गेशको च्यानलबाट हटाइसकिएको छ ।
उजुरी परेपछि दुर्गेशलाई आज मध्यान्ह प्रहरीले पक्राउ गरेको थियो । महानगरीय अपराध महाशाखाको टोलीले काठमाडौंको गोंगबुबाट उनलाई पक्राउ गरेको थियो ।
यसअघि आज विहान उनले गीतमा रहेका केही शब्द र सिन हटाएर राख्ने अथवा पूरै हटाउने त्यसबारे आफूले सल्लाह गरिरहेको बताएका थिए ।
उनले आफ्नो च्यानलबाट गीत हटाए पनि उनको अनुमति विना विभिन्न व्यक्तिले राखेका उक्त गीतको भिडियो भने युट्युबमा भेटिन्छ ।
उनले काम गर्ने क्रममा केही गल्ती भएको स्वीकार गरेका थिए ।
उनको ‘ह्याप्पी तिहार चिसो बियर’ बोलको गीतमा बियर सँगै गाँजा लगायत शब्द समेटिएपछि सामाजिक मूल्य मान्यता विपरितको गीत भन्दै चर्को आलोचना हुँदै आएको थियो ।
तीजमा उनले निकालेको ‘बीच्च बीचमा’ बोलको गीत लोकप्रिय भएको थियो । उक्त गीत लोकप्रिय भएपछि अहिले प्रदर्शनमा रहेको चलचित्र ‘छ माया छपक्कै’ले सोही लय र शैलीमा प्रचारका लागि दुर्गेशलाई गीत र भिडियो बनाउन लगाएको थियो ।
