एजेन्सी । प्रिमियर लिग क्लब आर्सनल ईएफएल कप फुटबलको चौथो चरणमा प्रवेश गरेको छ । मंगलबार राति भएको खेलमा नटिङघम फोरेष्टलाई ५–० गोल अन्तरले हराउँदै आर्सनलले चौथो चरणमा स्थान पक्का गरेको हो ।

इमिरेट स्टेडियममा भएको खेलमा आर्सनललाई सहज जित दिलाउन ग्राबियल मार्टीनेलीले दुई गोल गरे । यस्तै रोब होल्डीङ, जोसेप विल्लक र रेइस नेल्सनले समान एक–एक गर्न सफल भए ।

पहिलो हाफमा एक गोल गरेको आर्सनलले दोस्रो हाफमा थप चार गोल गर्न सफल भएको थियो । आर्सनलका लागि खेलको ३१ औँ मिनेटमा मार्टीनेलीले गोल गर्दै घरेलु टोलीलाई सुरुआती अग्रता दिलाए ।

खेलको ७१ औँ मिनेटमा होल्डीङले गोल गर्दै आर्सनलको अग्रता दोब्बर पारे । खेलको ७७ औँ मिनेटमा विल्लकले गोल गर्दै आर्सनललाई ३–० गोलको अग्रता दिलाए । निकै नै आक्रामक ढंगले प्रस्तुत भएको आर्सनलका लागि नेल्सनले खेलको ८४ औँ मिनेटमा चौथो गोल गरे । खेलको इन्जुरी समयमा मिर्टीनेलीले गोल गर्दै आर्सनललाई ५–० गोलको सहज जित दिलाए ।

त्यस्तै मंलबार राति भएको खेलमा लेस्टर सिटीले लुटोन टाउनलाई ४–० गोल अन्तरले पराजित गरेको छ । साउथह्यम्पटनले प्रोस्टमाउथलाई ४–० गोल अन्तरले पराजित गर्न सफल भएको थियो ।