एजेन्सी । १२ औं संस्करणको आईसीसी एकदिवसीय विश्वकप क्रिकेटको सेमिफाइनल समीकरण पूरा भएको छ । गएराति भारत श्रीलंकाविरुद्ध र दक्षिण अफ्रिका अस्ट्रेलियामाथि विजयी भएसँगै विश्वकपको सेमिफाइनल समीकरण पूरा भएको हो । 

फाइनल प्रवेशका लागि अब पाँच पटकको च्याम्पियन अस्टे«लियाले घरेलु टोली इङ्ल्यान्ड र भारतले न्युजिल्यानडको सामना गर्नेछन् । इङ्ल्यान्ड र न्युजिल्यान्ड पहिलो पटक उपाधि यात्रा तय गर्ने लक्ष्यमा मैदान उत्रिनेछन् । 

भारत तेस्रो उपाधिको खोजीमा रहँदा अस्टेलिया छैटौं कीर्तिमानको योजनामा रहनेछ । सेमिफाइनलसम्म भारतका रोहित शर्माले कीर्तिमानी शतक बनाएका छन् । पाँच शतक बनाएका उनी सर्वाधिक रन बनाउने खेलाडीको शीर्षस्थानमा छन् । 

भारतलाई सेमिफाइनलसम्म पुर्याउन महत्वपूर्ण भूमिका निर्वाह गरेका अनुभवी खेलाडी रोहितको शतकले अझै निरन्तरता पाउने सम्भावना छ । किनकी उनी अहिले उत्कृष्ट लयमा छन् । उनीसँगै सर्वाधिक रन बनाउने खेलाडीको दोस्रो नम्बरमा अस्ट्रेलियाका डेभिड वार्नर छन् । 

यी हुन् जारी विश्वकपमा सर्वाधिक रन बनाउने पाँच खेलाडी

१) रोहित शर्मा

अनुभवी खेलाडीको पहिचान बनाएका भारतीय ओपनर रोहित शर्मा सर्वाधिक रन बनाउने खेलाडीको शीर्षस्थानमा छन् । पाँच शतकको कीर्तिमानसँगै रोेहितले १ अर्धशतक गरी ६ सय ४७ रन बनाएका छन् । इङ्ल्यान्डमा र वेल्समा संयुक्त रुपमा चलिरहेको यो विश्वकपमा रोहितले अहिलेसम्म ६७ चौका र १४ छक्का प्रहार गरेका छन् । 

जारी विश्वकपमा उनको उच्च रन १ सय ४० हो । उनले पास्तिानविरुद्ध गरेको प्रदर्शन पनि त्यही हो । यस्तै श्रीलंकाविरुद्ध १ सय ५ रन बनाउँदै विश्वकपमा कीर्तिमान बनाएका रोहितले बंगलादेशविरुद्ध १ सय ४ रन, इङ्ल्यान्डविरुद्ध १ सय २ तथा दक्षिण अफ्रिकाविरुद्ध १ सय २२ रन बनाएका थिए । 

२) डेविड वार्नर 

एक वर्षपछि राष्ट्रिय टोलीमा फर्किएर उत्कृष्ट प्रदर्शन गरिरहेका अस्टे«लियाका डेविड वार्नर सर्वाधिक रन बनाउने खेलाडीको दोस्रो नम्बरमा छन् । लिग चरणको अन्तिम खेलमा दक्षिण अफ्रिकासँग पराजय भोगेपनि शतक बनाएका वार्नर ६ सय ३८ रनका साथ दोस्रो स्थानमा रहेका हुन् । वार्नर र रोहितबीच मात्र ९ रनको फरक छ । दुबै खेलाडीको टिम सेमिफाइनल पुगिसकेकाले यि दुई खेलाडीबीच चर्को प्रतिस्पर्धा हुने देखिएको छ । बल टेम्परिङ आरोपमा एक वर्षको प्रतिबन्धबाट फर्किएका वार्नरले जारी विश्वकपमा ३ शतक र ३ अर्धशतक बनाएका छन् । ६४ चौका र ८ छक्का उनको नाममा छ । उनको उच्च रन १ सय ६६ हो ।

३) सकिब अल हसन 

टोली बाहिरिएपनि बंगलादेशका सकिब अल हसन विश्वकपमा सर्वाधिक रन बनाउने खेलाडीको तेस्रो नम्बरमा छन् । ८ खेलमा ३ मा जित निकाल्दा बंगलादेशका सकिबले उत्कृष्ट प्रदर्शन गरे । टोलीलाई सेमिफाइनल पुर्याउन असफल भएपनि व्यक्तिगत रुपमा उनको प्रदर्शन शानदार रह्यो । उनले ६ सय ६ रन बनाए । 

१ सय २४ उच्च रन बनाएका सकिबले २ शतक र ५ अर्धशतक आफ्नो नाममा लेखाए । उनले ६० चौका र २ छक्का प्रहार गरेका थिए । टोली बाहिरिएसँगै उनको स्थानमा अन्य खेलाडी आउनसक्ने सम्भावना छ । 

४) एरोन फिन्च 

अस्टेलियाका कप्तान एरोन फिन्च पनि सर्वाधिक रन बनाउने खेलाडीको चौथो नम्बरमा छन् । ५ सय ७ रन बनाएका उनी तेस्रो स्थानमा रहेका सकिबको स्थानलाई पछ्याइरहेका छन् । १ सय ५३ उच्च रन बनाएका कप्तान फिन्चले २ शतक र ३ अर्धशतक बनाएका छन् । ४७ चौका प्रहार गरेका उनले १८ छक्का हानेका छन् । जारी विश्वकपमा सर्वाधिक १८ छक्का प्रहार गर्ने उनी दोस्रो खेलाडी हुन् । 

५) जोय रुट 

आयोजक इङ्ल्यान्डका जोय रुट सर्वाधिक रन जोड्ने खेलाडीको पाँचौं नम्बरमा छन् । ५ सय रनका अस्टेलियाका कप्तान फिन्चलाई पछ्याइरहेका रुट ७ रनले मात्र पछि छन् । इङ्ल्यान्डलाई सेमिफइनलमा पुर्याउन उत्कृष्ट प्रदर्शन गरेका रुटले २ शतक र ३ अर्धशतक बनाएका छन् । उच्च रन १ सय ७ बनाएका रुटले ४० चौका र २ छक्का प्रहार गरेका छन् ।