काठमाडौं । एएफसी कप फुटबलअन्तर्गत नेपालको लिग च्याम्पियन क्लब सिग्नेचर मनाङ मर्स्याङ्दी अन्तिम खेलमा पनि पराजित हुँदै प्रतियोगिताको अन्त्य गरेको छ ।
समूह चरणको अन्तिम खेलमा सिग्नेचर मनाङ मर्स्याङ्दी क्लब चेन्नईयिन एफसीसँग ३-२ गोल अन्तरले पराजित भएको हो । एन्फा कम्प्लेक्समा पहिलो हाफ गोलरहित बराबरी खेलेको चेन्नईयिनका लागि खेलको ५३ औँ मिनेटमा मोहमद रफीले गोल गर्दै टिमलाई सुरुवाती अग्रता दिलाएका थिए ।
त्यस्तै खेलको ६६ औँ मिनेटमा इली सावियाले गोल गर्दै टिमलाई जिततर्फ लिए । उनले डिबक्सबाट बल लिएर गोल रक्षकलाई छलाउँदै गोल गरेका थिए । यता मनाङका लागि खेलको ७१ औँ मिनेटमा अफीज आलावले गोल गर्दै टिमलाई २-१ को स्थितीमा पुर्याए । उनले सेन्टरबाट लिएको बल गोलमा परिणत भएको थियो ।
ओलावलालेने खेलको ७९ औँ मिनेटमा गोल गर्दै मनाङलाई २-२ गोलको बराबरीमा रोके । डी एरीयाको बल उनले क्रस प्रहार गर्दै गोल गरेका थिए ।
खेलको ८८ औँ मिनेटमा चेन्नईयिनका रफीले व्यक्तिगत दोस्रो गोल गर्दै टिमलाई जित दिलाए ।
जितसँगै चेन्नईयिन अघिल्लो चरण प्रवेश गरेको छ भने मनाङ यसअघि नै लिग चरणबाट बाहिरि सकेको थियो । प्रतियोगिताको अन्य खेलको तुलनामा मनाङले आजको खेलमा उत्कृष्ट प्रदर्शन गरे पनि सान्तोना जित भने निकाल्न सकेन् ।
तस्बिर सौजन्य : रमेश कान्छो