काठमाडौं । ब्याटिङमा जोन्सन चार्ल्स र बलिङमा हाइदेन वाल्स चम्किएपछि ट्वान्टी–२० शृंखलाको तेस्रो खेलमा वेस्ट इन्डिज ‘ए’ ले नेपालविरुद्ध ७६ रनको सहज जित निकालेको छ ।

बुधबार कीर्तिपुरस्थित त्रिवि क्रिकेट मैदानमा सम्पन्न खेलमा वेस्ट इन्डिज ‘ए’ ले प्रस्तुत गरेको २२८ रनको लक्ष्य पछ्याउने क्रममा नेपालले १९.२ ओभरमा सबै विकेट गुमाएर १५१ रनमात्र बनाउन सक्यो । 

नेपालका ओपनर लोकेश बमले २८ रन बनाए । कुशल मल्लले २० रन थप्दा विनोद भण्डारी र अनिल साहले १४ रन थपे । नवौँ नम्बरमा ब्याटिङका लागि आएका करण केसीले २८ रन जोडे । यसबाहेक नेपालका अन्य ब्याटरले दोहोरो अंकमा रन जोड्न सकेनन् ।

वेस्ट इन्डिजका हायदेन वाल्सले तीन विकेट लिए । उनले चार ओभरमा २८ रन खर्चिए । गुडाकेश मोटीले दुई विकेट लिए । फाबियन एलेन, ओबेड म्याकोइ र म्याथ्यु फोर्डेले समान एक विकेट हात पारे ।

त्यसअघि टस जितेर ब्याटिङमा आएको वेस्ट इन्डिजले निर्धारित २० ओभरमा तीन विकेट गुमाएर २२७ रनको योगफल खडा गरेको थियो ।

वेस्ट इन्डिजबाट ओपनिङमा आएका चार्ल्सले अविजित ११९ रन बनाए । उनले ६१ बलमा १३ चौका र सात छक्का प्रहार गरे । २७–१ को अवस्थाबाट चार्ल्सले दोस्रो विकेटका लागि आन्द्रे फ्लेचरसँग १५२ रनको साझेदारी गर्दै वेस्ट इन्डिजको इनिङ्स सम्हालेका थिए ।

फ्लेचरले ३३ बलमा चार चौका र तीन छक्कासहित ५३ रन बनाए । फाबियन एलनले १९ र एलिक एथानाजेले १७ रन बनाए । किमो पाउल १३ रनमा अविजित रहे ।

नेपालका करण केसी र सागर ढकालले समान एक विकेट लिए ।

आजको खेलमा मुख्य प्रशिक्षक मोन्टी देसाईले नियमित कप्तान रोहितकुमार पौडेललाई राखेका थिएनन् । दीपेन्द्रसिंह ऐरीले नेपाली टिमको कप्तानी सम्हाल्दा यसअघि मौका पाएका लोकेश बम र अनिल साह पनि प्लेइङ–११ मा थिए । नेपाली टिमका आज विकेटकिपर ब्याटर विनोद भण्डारीले पनि मौका पाएका थिए । 

पाँच खेलको ट्वान्टी–२० शृंखलाका लागि नेपाल भ्रमणमा आएको वेस्ट इन्डिज ‘ए’ ले यसअघिको दोस्रो खेलमा घरेलु टिमलाई १० रनले हराएको थियो । पहिलो खेलमा भने नेपालले चार विकेटको जित निकालेको थियो ।

यी दुई टिमबीचको चौथो खेल बिहीबार र पाँचौँ तथा अन्तिम खेल शनिबार हुनेछ ।