काठमाडौं । म्यानमारकी स्टेट काउन्सिलर तथा विदेश मन्त्री आङ साङ सूचि र कम्बोडियाका प्रधानमन्त्री हुन सेन नेपालको औपचारिक भ्रमणको सिलसिलामा बिहीबार काठमाडौं आउने भएका छन् । सूचि र सेनको नेपाल भ्रमणको औपचारिक घोषणा परराष्ट्र मन्त्रालयले मंगलबार गरेको हो । 

म्यानमारकी स्टेट काउन्सिलर सूचि र कम्बोडियाको प्रधानमन्त्री सेन दुवै प्रधानमन्त्री केपी शर्मा ओलीको निमन्त्रणमा आउन लागेको परराष्ट्रले जनाएको छ । उनीहरु विवादास्पद एक संस्थाले आयोजना गर्न लागेको एक कार्यक्रममा सहभागी हुन नेपाल आउन लागेका हुन् । 

परराष्ट्र मन्त्रालयले सूचिको नेपाल भ्रमण ३ दिनको र सेनको २ दिनेको हुने जनाएको छ । भ्रमणका बेला म्यानमारकी स्टेट काउन्सिलर सूचिले राष्ट्रपति विद्यादेवी भण्डारीसँग शिष्टाचार भेट गर्नेछिन् भने प्रधानमन्त्री केपी शर्मा ओलीसँग द्विपक्षिय वार्ता गर्नेछिन् । सूचि र ओलीबीच आपसी हितका  विषयमा छलफल हुने परराष्ट्र मन्त्रालयद्वारा मंगलबार जारी विज्ञप्तिमा उल्लेख छ । 

नेपालमा रहँदा स्टेट काउन्सिलर सूचिसँग परराष्ट्र मन्त्री प्रदीपकुमार ज्ञवालीले पनि भेट गर्नेछन् । स्टेट काउन्सीलर भएपछि सूचिको यो पहिलो नेपाल भ्रमण हो । 

भ्रमणका बेला कम्बोडियाको प्रधानमन्त्री सेनले पनि राष्ट्रपति भण्डारीसँग शिष्टाचार भेट गर्नेछन् भने प्रधानमन्त्री ओलीसँग द्धिपक्षीय बैठकमा सहभागी हुनेछन् । परराष्ट्र मन्त्री प्रदीपकुमार ज्ञवालीले सेनसँग शिष्टाचार भेट गर्ने जनाइएको छ । कम्बोडियाको प्रधानमन्त्री सेन पहिलो पटक नेपाल आउन लागेका हुन् । 

सूचि र सेन दुवै ‘एसिया पेसिफिक समिट–२०१८’ मा सहभागी हुन नेपाल आउन लागेका हुन् ।  नेपाल सरकार, विवादास्पद संस्था युनिभर्सल पीस फेडरेसन–नेपाल (यूपिएफ–नेपाल), नेसनल कन्फ्रेन्स अफ एसियन पोलिटिकल पार्टीज् (आइक्याप) लगायतको संयुक्त आयोजनामा उक्त समिट काठमाडौंमा हुँदैछ । समिटको अध्यक्षता ने क पाका नेता तथा पूर्व प्रधानमन्त्री माधवकुमार नेपालले गर्नेछन् । 

समिटको आयोजक मध्ये एक युनिभर्सल पीस फेडरेसन–नेपाल माथि बेलाबखत क्रिस्चियन धर्म प्रचार गरेको आरोप लाग्दै आएको छ । युनिभर्सल पीस फेडरेसन–नेपालका अध्यक्ष एकनाथ ढकाल हुन् । उनी अहिले ने क पासँग आवद्ध छन् ।