मेलम्ची । मेलम्ची नगरपालिकाका प्रमुख डम्बर अर्यालले तत्कालका निम्ति बाढीबाट प्रभावितलाई राहत र पुनस्थापनाका लागि सहयोग गर्न आग्रह गरेका छन् ।

बुधबार सभामुख अग्निप्रसाद सापकोटासितको छलफलमा उनले मेलम्ची बजार क्रमशः डुब्दै गएकोले आफूहरु त्रसित रहेको पनि बताए ।

उनले मेलम्ची नगरपालिकामा ३०० र नेपाली सेनाको ब्यारेकमा ३०० गरी बाढीबाट प्रभावित ६०० जनालाई खानाको व्यवस्था गरिएको जानकारी दिए । छलफलमा प्रदेशसभा सदस्यहरु पनि सहभागी छन् ।

सभामुख सापकोटा आज बिहान नेपाली सेनाको हेलिकोप्टरमार्फत त्यसतर्फ गएका हुन् । उनले बाढीबाट प्रभावित बनेका स्थानीयसँग कुराकानी गरेका छन् । क्षतिबारे जानकारी लिएका छन् ।

इन्द्रावती र मेलम्ची नदीमा आएको बाढीले सिन्धुपाल्चोकको मेलम्ची नगरपालिका र हेलम्बु गाउँपालिकामा ठूलो क्षति पुर्‍याएको छ ।