वासिङ्टन । अमेरिकी संघीय जाँच ब्युरो (एफबीआई)ले पूर्वराष्ट्रपति डोनाल्ड ट्रम्पका निजी वकिलको घर र अफिसमा छापा मारेको छ । युक्रेनसँगको सम्बन्धलाई लिएर न्युयोर्कका पूर्वमेयरसमेत रहेका रुडी जुलियानीको घर र अफिसमा एफबीआईले छापा मारेको बीबीसीले जनाएको छ ।

बुधबार एफबीआईले ७६ वर्षीय जुलियानीको अपरइस्ट साइड अपार्टमेन्ट र पार्क एभेन्युस्थित कार्यालयमा छापा मारेर विभिन्न विद्युतीय उपकरणसहितका सामानहरु जफत गरेको छ । उनी परराष्ट्र प्रतिनिधिको भूमिका निर्वाह गर्न असफल रहेको वारेन्टमा उल्लेख गरिएको छ ।

सन् २०२० को राष्ट्रपतीय निर्वाचनअघि जुलियानीले युक्रेनबाट डेमोक्र्याटिक उमेदवार जो बाइडेन र उनका छोरा हन्टर बाइडेनविरुद्ध सूचना संकलन गर्ने प्रयास गरेको जनाइएको छ । युक्रेनको एक ऊर्जा कम्पनीको बोर्डमा रहेका हन्टर र तत्कालीन उमेदवार बाइडेनमाथि अनुसन्धान गर्नका लागि युक्रेनी अधिकारीमाथि दबाब दिन जुलियानीले मुख्य भूमिका खेलेको बताइएको छ । जो बाइडेन अमेरकी राष्ट्रपति निर्वाचित भइसकेका छन् भने हन्टरमाथि अमेरिकी न्याय विभागले असम्बन्धित आपराधिक करका विषयमा जाँच गरिरहेको छ । यी दुवैले आफूमाथि लगाइएको आरोपको खण्डन गर्दै आएका छन् ।

जुलियानीका वकिलले भने उनले कुनै कानुन नतोडेको जिकिर गर्दै एफबीआईको छापा मार्ने कार्यलाई अनावश्यक र गैरकानुनी भनेका छन् ।