काठमाडौं । जनता बैंकले चुक्ता पुँजी बढाउन आगामी मंसिर १ गतेदेखि २ कित्ता बराबर १ कित्ता अनुपातमा हकप्रद सेयर निष्कासन गर्ने भएको छ ।

बैंकले प्रतिकित्ता १ सय रुपैयाँ अंकित मूल्यको १ करोड ३ लाख कित्ता हकप्रद सेयर निष्कासन गर्न लागेको हो । निष्कासन बन्द हुने हुने मिति पुस ५ गतेलाई तोकिएको छ । हकप्रद सेयर निष्कासनपछि बैंकको चुक्ता पुँजी ३ अर्ब ९ करोड रुपैयाँ पुग्नेछ । हाल चुक्ता पुँजी २ अर्ब ६ करोड रुपैयाँ छ । आगामी असारसम्म चुक्ता पुँजी ८ अर्ब रुपैयाँ पुर्याउन बैंकले हकप्रद सेयर निष्कासन गर्न लागेको हो । 

यसैगरी संस्थापक र सर्वसाधारणको लगानी संरचना परिवर्तन गरेको बैंकले जनाएको छ । जसअनुसार ५१ प्रतिशत संस्थापक र ४९ प्रतिशत सर्वसाधारणको स्वामित्व रहनेछ । बैंकले आर्थिक वर्ष ०७५/०७६मा चुक्ता पुँजी बढाएर ९ अर्ब ४४ करोड ८० लाख रुपैयाँ पुर्‍याउने प्रक्षेपण गरेको छ । असारसम्म बैकले निक्षेप परिचालन ४० अर्ब ४२ करोड रुपैयाँ पुर्‍याउने लक्ष्य लिएको छ । 

आउँदो असारसम्म बैंकले ५४ करोड १६ लाख रुपैयाँ खुद नाफा गर्ने लक्ष्य लिएको छ । यस्तै आव ०७५/०७६ मा खुद नाफा १ अर्ब रुपैयाँ लक्ष्य लिएको बैंकले जानकारी दिएको छ । चालु आवमा प्रतिसेयर आम्दानी ६ रुपैयाँ ७६ पैसा रहेकोमा बढाएर ३ वर्षमा ११ रुपैयाँ बढी पुर्‍याउने बैंकले जनाएको छ ।