काठमाडौं । नेपाली कांग्रेसको विधान संशोधन मस्यौदा समितिले सोमबारबाट विधानको प्रारम्भिक मस्यौदामाथि छलफल सुरु गरेको छ । विधान संशोधन मस्यौदा समितिले सोमबारदेखि प्रदेश नम्बर १ को इलाम, प्रदेश नम्बर ३ को ललितपुर र कर्णाली प्रदेशको सुर्खेतबाट प्रारम्भिक मस्यौदामाथि एकसाथ छलफल सुरु गरेको हो । 

विधान संशोधन मस्यौदा समितिले इलाममा प्रारम्भिक मस्यौदामाथि छलफल गर्न समिति सदस्यसमेत रहेका केन्द्रीय सदस्यहरु आनन्दप्रसाद ढुंगाना र नवीन्द्रराज जोशीलाई खटाएको छ । उक्त छलफलमा झापा, इलाम, पाँचथर, ताप्लेजुङका जिल्ला सभापतिहरु, महासमिति सदस्यहरु, क्षेत्रीय सभापतिहरु, महाधिवेशन प्रतिनिधिहरु, दुई जना प्रतिनिधिसभा सदस्य, एक जना राष्ट्रियसभा सदस्य र दुई जना प्रदेशसभा सदस्य तथा कांग्रेसका भ्रातृ एवं शुभेच्छुक संस्थाका प्रमुखहरु सहभागी छन् । दुई दिनसम्म चल्ने छलफलमा कांग्रेसका केन्द्रीय सदस्य गोपालमान श्रेष्ठ प्रमुख अतिथि रहेका छन् । 

विधान संशोधन मस्यौदा समितिका सदस्यद्वय ढुंगाना र जोशीको नेतृत्वमा रहेको उक्त टोलीले असोज ११ र १२ गते प्रदेश नम्बर १ कै विराटनगरमा छलफल तथा अन्तरक्रिया गर्ने बताइएको छ । उक्त छलफलमा मोरङ, सुनसरी, उदयपुर, धनकुटा, भोजपुर, ओखलढुङ्गा, संखुवासभा, सोलुखुम्वु, खोटाङ, तेह्रथुमका जिल्ला सभापतिहरु, महासमिति सदस्यहरु, क्षेत्रीय सभापतिहरु, महाधिवेशन प्रतिनिधिहरु, १३ जना प्रतिनिधिसभा सदस्य, १९ जना प्रदेशसभा सदस्य र भ्रातृ एवं शुभेच्छुक संस्थाका प्रमुखहरु सहभागी रहने कांग्रेसले जनाएको छ ।

विधान संशोधन मस्यौदा समितिले प्रदेश नम्बर ३ अन्तर्गत ललितपुरको सानेपामा छलफल तथा अन्तरक्रिया कार्यक्रम गरिरहेको छ । कांग्रेसको केन्द्रीय कार्यालयमा दुई दिनसम्म चल्ने छलफल तथा अन्तरक्रिया कार्यक्रममा सभापति शेरबहादुर देउवा प्रमुख अतिथि रहेका छन् । कार्यक्रममा विधान संशोधन मस्यौदा समितिका सदस्यद्वय दिलेन्द्रप्रसाद बडू र सीता गुरुङले सहजीकरण गरिरहेका छन् । 

काठमाडौँ, ललितपुर, नुवाकोट, रसुवा, धादिङ, चितवन र मकवानपुरका जिल्ला सभापतिहरु, महासमिति सदस्यहरु, क्षेत्रीय सभापतिहरु, महाधिवेशन प्रतिनिधिहरुसँगै ७ जना प्रतिनिधिसभा सदस्य, २ जना राष्ट्रियसभा सदस्य, १९ जना प्रदेशसभा सदस्यसहित भ्रातृ एवं शुभेच्छुक संस्थाका प्रमुखहरुहरु छलफल कार्यक्रममा सहभागी छन् ।  

प्रदेश नम्बर ३ का काभ्रे, भक्तपुर, दोलखा, रामेछाप, सिन्धुली, सिन्धुपाल्चोक जिल्ला सभापतिहरु, महासमिति सदस्यहरु, क्षेत्रीय सभापतिहरु, महाधिवेशन प्रतिनिधिहरु, एक जना प्रतिनिधिसभा सदस्य, तीन जना प्रदेशसभा सदस्य र भ्रातृ एवं शुभेच्छुक संस्थाका प्रमुखहरुसँग असोज ११ र १२ गते धुलिखेलमा छलफल कार्यक्रम गरिने समितिले जनाएको छ । 
त्यस्तै, कांग्रेसको विधान संशोधन मस्यैदा समितिले कर्णाली प्रदेशका लागि सुर्खेतको विरेन्द्रनगरमा प्रारम्भिक मस्यौदामाथि छलफल गरिरहेको छ । समितिका सदस्य मानबहादुर विश्वकर्मा र प्रदीप पौडेलले सहजीकरण गरिरहेको कार्यक्रममा चित्रलेखा यादव प्रमुख अतिथि छन् । 

दुई दिनसम्म चल्ने उक्त छलफलमा सुर्खेत, हुम्ला, जुम्ला, मुगु, कालिकोट, डोल्पा, दैलेख, जाजरकोट, रुकुम पश्चिम, सल्यानका जिल्ला सभापतिहरु, महासमिति सदस्यहरु, क्षेत्रीय सभापतिहरु, महाधिवेशन प्रतिनिधिहरु, एक जना प्रतिनिधिसभा सदस्य, ६ जना प्रदेशसभा सदस्य र भ्रातृ एवं शुभेच्छुक संस्थाका प्रमुखहरु उपस्थित छन् । 

समितिले प्रदेश नम्बर २ को जनकपुरमा असोज ९ र १० गते तथा विरगञ्जमा १२ र १३ गते, प्रदेश नम्बर ४ को पोखरामा ९ र १० गते तथा बाग्लुङमा १२ र १३ गते प्रारम्भिक मस्यैदामाथि छलफल तथा अन्तरक्रिया गरेर सुझाव संकलन गर्ने भएको छ । 

समितिका अनुसार प्रदेश नम्बर ५ को भैरहवामा ९ र १० गते तथा घोराहीमा १२ र १३ गते तथा प्रदेश नम्बर ७ को धनगढीमा १२ र १३ गते प्रारम्भिक मस्यैदामाथि छलफल हुनेछ । 
महामन्त्री पूर्णबहादुर खड्काको संयोजकत्वमा रहेको विधान संशोधन समितिले छलफलका लागि विकल्पसहितको प्रारम्भिक मस्यौदा तयार गरेर सात वटै प्रदेशमा छलफल गरेर सुझाव संकलन गरिरहेको छ । सोमबारदेखि असोज १३ गतेसम्म सात वटै प्रदेशका विभिन्न स्थानमा सुझाव संकलनका लागि प्रारम्भिक मस्यौदामाथि छलफल गर्ने कार्यक्रमहरु तय गरिएको समितिले जनाएको छ । 

प्रदेशहरुमा आयोजना गरिने छलफल कार्यक्रममा नेता–कार्यकर्ताहरुबाट प्राप्त सुझावका आधारमा विधानको अन्तिम मस्यौदा तयार गरिने बताइएको छ । मस्यौदा समितिले प्रारम्भिक मस्यौदामा प्राप्त सुझावहरुको आधारमा अन्तिम मस्यौदा तयार गरेर केन्द्रीय कार्यसमिति समक्ष पेश गर्ने म्याण्डेट पाएको छ । 

‘‘एकीकृत मस्यौदामा समेटिएका सुझावहरु लिएर हामी प्रदेशमा जान्छौं । प्रदेशमा कांग्रेसको महासमिति, महाधिवेशन प्रतिनिधिहरु, जिल्ला सभापतिलगायतका लिडरहरु हुन्छन् । मस्यौदमा समेटिएका इस्युहरुमा उहाँहरुको राय लिन्छौं । राय आइसेकपछि कुन प्रदेशबाट के–कस्तो राय आयो, ज्यादा ग्रेविटी कतापट्टि देखिन्छ, त्यो आधारमा विधान मस्यौदा तयार हुन्छ,’’ मस्यौदा एकीकृत गर्ने जिम्मेवारी पाएका केन्द्रीय सदस्य रमेश लेखकले बाह्रखरीसँग भने ।