काठमाडौं । महानगरीय प्रहरी परिसर काठमाडौंका एसएसपी विश्वराज पोखरेलले गुण्डा, तस्कर, अपराधीलाई संरक्षण गरेर मुलुक बन्न नसक्ने बताएका छन् । प्रहरी प्रभाग बलम्बुद्वारा आयोजित २ सय ५ औं भानुजयन्ती अवसरमा आयोजित खुला कविता प्रतियोगितामा एसएसपी पोखरेलले यस्तो बताएका हुन् ।
एसएसपी पोखरेलले भने, ‘‘हामी आफ्नो मान्छे अपराधी हो भन्ने जान्दाजान्दै पनि त्यसलाई कानुनको दायरामा ल्याएर सुधार गर्ने प्रयास गर्दैनौं, उल्टै बचाउन खोज्छौं । यस्तो प्रवृत्तिले समाज अपराधमुक्त हुन सक्दैन ।’’ पोखरेलले अपराध मुक्त समाज निर्माणमा आमनागरिकको भूमिका महत्वपूर्ण हुने भन्दै हरेक नागरिक बर्दी बिनाका प्रहरी भएको बताए । एसएसपी पाखरेलले आफू राजधानीलाई अपराधमुक्त अभियानमा लागेको बताउँदै आम नागरिकको सहयोगको अपेक्षा पनि गरे । ‘‘अपराधीको विरुद्धमा प्रहरी कठोर भएर प्रस्तुत हुन्छ, तपाईं सूचना दिएर सहयोग गर्नूस्,’’ एसएसपी पोखरेलले भने । महानगरीय प्रहरी प्रभाग बलम्बुकी प्रहरी निरीक्षक शर्मिला गुरूङले नेपाली साहित्यमार्फत् समाजमा सकारात्मक सन्देश दिन र कुसंगति विरूद्व धावा बोल्न कार्यक्रमको आयोजना गरिएको बताइन् । यस्तै प्रहरी निरीक्षक अमृत बस्नेतले समाजको हरेक गतिविधिमा सहयोग गर्न र अपराधमुक्त समाजको विकासमा प्रहरीको भूमिका अझ परिस्कृत हुनुपर्ने औंल्याए ।
महानगरीय प्रहरी प्रभाग नागढुङ्गाका प्रहरी निरीक्षक केशवराज भट्टले लागुऔषध प्रयोगबाट युवाहरुलाई बचाउनुपर्ने बताए । उनले युवाहरु लागुऔषधको दलदलमा फस्दै गएको र त्यहीबाट अपराधको जन्म हुने गरेको बताए । 
२ सय ५ औं भानु जयन्ती अवसरमा आयोजित प्रहरी मेरो साथी र लागुऔषध दुव्र्यसनी शिर्षकको खुला कविता प्रतियोगितामा ईसा पौडेल प्रथम, ज्ञानदवहादुर खड्का दोस्रो, मिरा जिसि काफ्ले तेस्रो र काजल थापा चौथो हुन सफल भएका थिए । उनीहरुलाई क्रमशः २० हजार,१५ हजार,१० हजार,५ हजार नगद पुरस्कार प्रदान गरिएको थियो । 

तस्बिर : रोशन दानी