काठमाडौं । नयाँ शक्ति पार्टी नेपालका संयोजक डा बाबुराम भट्टराईले बजेटले सरकारले ल्याएको बजेटले मुलुकको विकास हुन नसक्ने बताएका छन् । उनले मुलुकको विकासका लागि पानीजहाज भन्दा पनि सडक पहिलो प्राथमिकता हुनुपर्ने बताए । 
संसदमा बजेटबारे बोल्दै भट्टराईले भने, “प्रधानमन्त्रीजीलाई म सम्मान गर्छु, तर मुलुकको विकासको लागि पानीजहाज होइन, पहिला सडक बनाउने सपना देख्नुपर्छ । सडक, हवाईमार्ग त्यसपछि मात्र पानीजहाजको कुरा आउछ । अरुले जे गरे, त्यही गनुपर्छ भन्ने छैन ।”
उनले थपे, “आर्थिक फड्को मारोस् भन्ने सबैको चाहना छ । दुई तिहाई बहुमतको सरकारले घोषणापत्रमा देखाएको सपना बजेटसम्म आशा र सपना मरेको मलाई अनुभूत हुन्छ । मैले बजेट प्रस्तुत गर्न पाएको भए नयाँ फरम्याट बनाउँथें । बजेटले देखाएको सपना पूरा गर्न सपना प्रष्ट भएन । बाटो स्पष्ट हुनुपर्छ । दुई अंकको आर्थिक वृद्धि गरेर आर्थिक पुँजी निर्माण गर्ने दिशामा अर्थमन्त्री लाग्नुभएन । दुई दशकसम्म आर्थिक वृद्धि गर्न के गर्नुपर्छ भन्ने कुरामा अर्थमन्त्री छुट्नु भयो ।”
बजेटलाई न हाँसको चाल न कौवाको चाल भएको टिप्पणी गर्दै भट्टराईले मूल नै धमिलो भएपछि तल स्वतः पानी धमिलो हुने बताए । 
उनले ऋण लिएर मुलुकको विकास गनुपर्ने तर्क अघि सारे । “सबैभन्दा बढी ऋण लिएर अमेरिकाले विकास गरिरहेको छ । अमेरिकाले अन्य मुलुकसँग ऋण लिन हुने हामीले चाहिँ किन नहुने ? अनुदान बरु लिन हुँदैन । अनुदानमा धेरै सर्तहरु हुन्छन्,” उनले भने । 
उनले विदेशबाट नेपाल फर्कने युवाहरुलाई सय ग्राम सुन ल्याउन सरकारले दिएको भन्दै त्यसले सुन तस्करहरुको संख्या बढ्न सक्ने तर्क गरे ।