काठमाडौं । बाराको सिमरास्थित प्राथमिक स्वास्थ्य केन्द्रले ५ रुपैयाँमै दक्ष चिकित्सकबाट उपचार सेवा दिन थालेको छ । दक्ष चिकित्सक र आधुनिक प्रविधिबाट उपचार थालेपछि नजिकै रहेका निजी अस्पतालका बिरामीसमेत केन्द्रमा थालेका छन् । 

बाराकी स्थानीय लिलाकुमारी सार्की २ वर्षअघि रुखाखोकी, ज्वरो आएर उपचारका लागि धैरै पटक स्वास्थ्य केन्द्र गइन् तर कहिलै चिकित्सक भेटिनन् । उनी भन्छिन्, “डाक्टर त अहिले बिदामा हुनुहुन्छ भन्दै अस्पतालका कर्मचारीहरुले चेकजाँच नगरी  सिटामोल दिएर पठाएका थिए ।” त्यसपछि उनी कहिलै उपचारका लागि स्वास्थ्य केन्द्र गइनन् । अहिले छिमेकीले राम्रो उपचार हुन्छ भनेर सुनाएपछि उनी फेरि प्राथमिक स्वास्थ्य केन्द्रमै जान थालेकी छन् । “पहिलाको जस्तै डाक्टर नै नभेटिने होला जस्तो लागेको थियो तर अहिले धेरै नै परिवर्तन भएको रहेछ, सबै रोगको उपचार सेवा दिन थालेका रहेछन्,” सार्कीले भनिन् । 

लिलाकुमारीजस्तै धैरै पटक केन्द्रमा उपचार गर्न आउँदा डाक्टर नै नभेटिने, औषधी नपाइने आदि समस्या भएपछि बिरामीहरु निजी अस्पताल जान थालेका थिए । अहिले भने प्राथमिक स्वास्थ्य केन्द्र सुधारिएको छ । 

व्यवस्थापन समितिले सरकारी स्वामित्वको केन्द्रमा अपनत्व बढोस् भनेर ५ रुपैयाँ शुल्क तोकिएको बताएको छ । जटिल रोगका बिरामीबाहेक अन्य सरकारी स्वास्थ्य केन्द्रमा जान थालेपछि निजी अस्पतालहरूले समेत शुल्क घटाउन थालेका छन् । केन्द्रले वृद्धवृद्धा, अशक्त, विद्यार्थीलगायतलाई शुल्क तिर्नु नपर्ने व्यवस्था गरेको अस्पतालका प्रमुख श्रवणकुमार मण्डलले बताए । उनले भने, “केन्द्रमा सरकारले उपलब्ध गराएको ५८ प्रकारका औषधी निःशुल्क र ४८ प्रकारका ल्याब परीक्षण निजी अस्पताल भन्दा ५० प्रतिशत सस्तो दरमा दिने गरेका छौं ।” निजी अस्पतालका डाक्टरकोमा उपचार गराउँदा ३ सयदेखि ५ सयसम्म शुल्क तिर्नुपर्ने भएकाले बिरामीहरु सस्तो दरमा सेवा लिन केन्द्रमै आउने गरेको उनको भनाइ छ । पछिल्लो समय वीरगञ्ज तथा हैटौंडा उपचार गर्न जाने बिरामीसमेत सिमरा पिएचसीमा पहिलो परामर्श लिन आउने गरेको केन्द्र प्रमुख मण्डल बताउँछन् ।

स्थानीय वडा सदस्य चिनिकुमार दर्जीले आफू र परिवारका सदस्यको नियमित स्वास्थ्य परीक्षण केन्द्रमा गर्ने गरेकोे बताइन् । दक्ष चिकित्सक र सस्तोमा उपचार पाउने भएपछि केन्द्रप्रति मोह बढेको दर्जीको भनाइ छ । उनले भनिन्, “अझ यसको प्रचारप्रसार ग्रामीण बस्तिहरूसम्म पुगे ठूलो राहत मिल्ने थियो ।”

सिमरा प्राथमिक स्वास्थ्य केन्द्रमा ३ एमबिबिएस डाक्टर, १ स्टाफ नर्स, १ हेल्थ असिस्टेन्ट, ३ सिएमए, ३ अनमी, १ फार्मेसी असिष्टेन्ट, १ ल्याब असिष्टेन्ट र केही कार्यालय सहयोगीको दरबन्दी छ । केन्द्रमा जाडोयाममा दैनिक ६० र गर्मी महिनामा १ सय ५० जनासम्म बिरामी आउने गरेका छन् । बारामा रहेका ५ वटा प्राथमिक स्वास्थ्य केन्द्रमध्ये सिमरा स्वास्थ्य केन्द्र उत्कृष्ट बनेकोे जिल्ला जनस्वास्थ्य कार्यालयले जनाएको छ । 

स्वास्थ्य मन्त्रालयले अब पीएचसी स्थानीय तहले जिम्मा दिने भएपछि जितपुर सिमरा उपमहानगरका प्रमुख तथा सिमरा पिएचसीका संरक्षक डा. कृष्ण पौडेलले केन्द्रमा रहेको व्यवस्थापनको पुनर्संरचना तत्कालै गर्ने बताए । “यहाँबाट वितरित सेवासुविधा वृद्धिका निम्ती स्थानीय श्रोत परिचालन गर्दै स्तरोन्नति र थप जनशक्ति आवश्यक परेमा स्वास्थ्य मन्त्रालयसँग माग गर्छौ,” उनले भने ।