काठमाडौं । अख्तियार दुरुपयोग अनुसन्धान आयोगले नेपाल आयल निगम लिमिटेड गण्डकी प्रादेशिक कार्यालय गगनगौँडाका प्रादेशिक प्रमुख चितरंजन दाससहित पाँचजना र एक संस्थाविरुद्ध भ्रष्टाचार मुद्दा दायर गरेको छ ।

उनीहरूले चार लाख ४८ हजार ५२५ रुपैयाँ भ्रष्टाचार गरेको ठहर गर्दै अख्तियारले विशेष अदालत काठमाडौंमा आइतबार मुद्दा दायर गरेको हो ।

अख्तियारले मुद्दा दायर गरेका अन्यमा कास्कीको तालचोकस्थित पश्चिमाञ्चल ट्रेडर्स तथा उक्त कम्पनीका सञ्चालक बाबुराम जमरकट्टेल, गण्डकी धौलागिरी पेट्रोलियम एसोसिएसनका तत्कालीन प्रतिनिधि जगन्नाथ ढुंगाना र लक्ष्मण रानाभाट र ग२ख ८३६ नम्बरका ट्यांकर चालक निर्मल थापा छन् । 

आइतबार दायर गरिएको मुद्दामा प्रत्येकसँग चार लाख ४८ हजार ५२५ रुपैयाँ बिगो मागदाबी गरिएको छ । 

नेपाल आयल निगम प्रादेशिक कार्यालय गगनगौँडाका डिपो प्रमुख समेतको मिलेमतोमा बिलमा उल्लेख भएको भन्दा बढी परिमाणमा पेट्रोलियम पदार्थ सप्लाइ गरेको भन्ने उजुरी परेपछि अख्तियारले अनुसन्धान अघि बढाएको थियो ।

अनुसन्धान हुँदा उनीहरूले चार लाख ४८ हजार ५२५ रुपैयाँ भ्रष्टाचार गरेको खुलेको अख्तियारद्वारा आइतबार जारी विज्ञप्तिमा उल्लेख छ ।