काठमाडौं । राष्ट्रिय स्वतन्त्र पार्टीले चितवनबाट ‘जनयात्रा अभियान’को शुभारम्भ गरेको छ । शनिबार चितवनबाट रास्वपाका शीर्ष नेताहरू उपसभापति डा. स्वर्णिम वाग्ले, सहमहामन्त्री कविन्द्र बुर्लाकोटी, सुमना श्रेष्ठ, विराजभक्त श्रेष्ठ, हरि ढकाललगायत नेताले जनयात्रा अभियानको शुभारम्भ गरेका हुन् । 

जनयात्रा अभियानको शुभारम्भलाई पार्टी सभापति रवि लामिछानेले विशेष सम्बोधन गर्ने भनिए तापनि उनलाई शुक्रबार राति नै प्रहरीले पक्राउ गरेपछि अन्य नेताले सम्बोधन गर्दै जनयात्रा शुभारम्भ गरेका थिए ।

सो क्रममा रास्वपा उपसभापति डा स्वर्णिम वाग्लेले राज्यले नियतवश लामिछानेमाथि अन्याय गरेको जिकिर गरे । उच्च अदालतको आदेश जिल्ला अदालतमा नपुर्‍याई बदला लिने उद्देश्यले सरकारले लामिछानेलाई रातारात पक्राउ गरेको उनले बताए । 

यसअघि लामिछानेले आफूलाई पक्राउ गरे पनि जनयात्रा अभियान नरोक्न नेताहरूलाई निर्देशन दिएका थिए । जनताको कुरा सुन्ने भन्दै रास्वपाले जनयात्रा अभियान सुरु गरेको हो ।