काठमाडौं । लक्ष्मी हुन्डाई ग्रुपका प्रबन्ध निर्देशक निरन्जन श्रेष्ठले स्टार्टअपलाई सबैले प्रोत्साहन गर्न आवश्यक रहेको बताएका छन् । अर्थतन्त्रको विकासका निम्ति स्टार्टअपलाई प्रोत्साहन गरिनुपर्नेमा उनले जोड दिए ।

शनिबार (चैत २३) काठमाडौंमा आयोजित ‘एनसेल बाह्रखरी गल्फ तथा आर्थिक परिसंवाद’ कार्यक्रममा कार्यपत्र प्रस्तुत गर्दै उनले नेपालको आर्थिक अवस्था सुधारका निम्ति स्टार्टअपमा सरकार र निजी क्षेत्रले मिलेर काम गर्नुपर्ने बताए । उनले सार्वजनिक सेवामा जवाफदेहिता बढाउन जरुरी रहेको औँल्याए ।

“जलविद्युत् विकासको कुरा गरिरहेका छौँ, तर एउटा रुख काट्न यता र उता घुमाइएको छ,” उनले भने, “रेगुलेटर र रेगुलेटरीको सुधार हुन आवश्यक रहेको छ ।”

बजारमा ‘बाफिया’ पनि केहीलाई मात्र सहज हुने गरी आएको उनले बताए ।