काठमाडौं । राष्ट्रिय स्वतन्त्र पार्टीका सभापति रवि लामिछानेले आफूले अदालतको आदेशको सम्मान गर्दै आफै आजै अहिले नै  गिरफ्तारी दिने बताएका छन् । 

रविलाई रूपन्देही जिल्ला अदालतले एक करोड धरौटीमा रिहा हुने आदेश गरेको थियो । उच्च अदालत तुलसीपुरको बुटवलले उक्त मुद्दा बदर गर्दै पुर्पक्षका लागि थुनामा राखेर अनुसन्धान अघि बढाउन आदेश दिएपछि उनले आफैँ गएर गिरफ्तारी दिने बताएका हुन् । 

“सम्मानित अदालतको आदेशको सम्मान गर्दै म आफैँ आजै अहिले नै  गिरफ्तारी दिँदै छु,” उनले सामाजिक सञ्जालमा लेखेका छन्, “साथै न्यायलयका अन्य ढोकाहरू मेरा लागि खुल्ला होलान् नै । न्यायका लागि दुनियाँका सबै ढोका ढकढक्याउँछु ।”

उनले आफूमाथि ठूलो अन्याय भएको बताएका छन् । साथै चितवनको सभा नरोक्न निर्देशन दिएका छन् । 

रास्वपाले शनिबार चितवनबाट जनयात्राको थालनी गर्ने घोषणा गरेको छ । भोलि दिउँसो २ बजेबाट सुरु हुने उक्त कार्यक्रम नरोक्न उनले पार्टी नेता कार्यकर्तालाई आग्रह गरेका हुन् ।