काठमाडौं । प्रधानमन्त्री केपी शर्मा ओलीले बोलाएको सर्वदलीय बैठकमा हालको संविधानविरुद्ध भइरहेको षड्यन्त्रमूलक गतिविधिको बारेमा समीक्षा भएको छ । सिंहदरबारस्थित प्रधानमन्त्री तथा मन्त्रिपरिषद् कार्यालयमा आइतबार बसेको गणतन्त्र पक्षधरहरूको बैठकमा संविधान रक्षाको विषयमा सबै एकमत रहेको निष्कर्ष निकालिएको छलफलमा सहभागी गृहमन्त्री रमेश लेखकले जानकारी दिए ।

"संघीय लोकतान्त्रिक गणतान्त्रिक शासन व्यवस्था उल्ट्याउने, नेपालको संविधानलाई नै समाप्त गर्ने कार्य भइरहेको छ । यस्ता षड्यन्त्रमूलक गतिविधिको मुख्य जिम्मेवार पूर्वराजा ज्ञानेन्द्र शाह भएको सबैदलको एकमत छ," उनले भने ।

तीनकुनेमा भएको अमानवीय प्रकृतिको घटनामा सञ्चारमाध्यम, व्यापारव्यवसाय, राजनीतिक संस्थाको कार्यालयमा भएको आक्रमणबारे छलफल भएको उनले बताए ।