काठमाडौं । राष्ट्रिय स्वतन्त्र पार्टी (रास्वपा)की सांसद सोविता गौतमले गृहमन्त्री रमेश लेखकको राजीनामा माग गरेकी छन् । मंगलबार (चैत १९) संघीय संसद् भवनबाहिर सञ्चारकर्मीसँग कुरा गर्दै उनले गृहमन्त्रीको राजीनामा मागेकी हुन् ।

यही चैत १५ गते काठमाडौंको तीनकुनेमा प्रदर्शनक्रममा प्रशासनले आवश्यक कार्य पूरा नगरेको र सरकारले लापरबाही गर्दा युवकको ज्यान गएको उनले जिकिर गरिन् । गृहमन्त्रीले सुरक्षा संयन्त्रको जिम्मा लिन नसकेको भन्दै उनले मार्गप्रशस्त गर्नुपर्नेमा जोड दिइन् ।

“उहाँ (गृहमन्त्री)ले सुरक्षा संयन्त्रको जिम्मा लिन नसक्नुभएको स्पष्ट देखिन्छ । उहाँले मार्गप्रशस्त गर्नुभए हुन्छ, राजीनामा दिए हुन्छ,” उनले भनिन्, “अरू सक्ने मान्छेलाई जिम्मेवारी दिनुभए हुन्छ । यो सरकारकै पनि मन्त्रीहरू फेरबदल गर्ने, नेतृत्व बदल्ने बेला भएजस्तो हुन्छ ।”

उनले प्रहरीको गोलीबाट मारिएका सविन महर्जनका बारेमा सरकारले एउटा भनेको र भिडियोको वास्तविकता अर्कै रहेको बताइन् । “सविन महर्जनको कुरा छ । भिडियो नआउँदासम्म तपाईं हामीलाई थाहा थिएन,” उनले भनिन्, “उहाँहरूले त दुईतर्फ झडप भएर गोली लागेको भन्ने किसिमको थियो । अहिले भिडियो फुटेजमा रियालिटी अर्कै छ । यसबाटै रियालिटी एउटा र भनिएको अर्को रहेछ भन्ने स्पष्ट हुन्छ ।”

उनले घटनामा सरकार चुकेको टिप्पणी गरिन् । “आगो नलाग्नुपर्ने ठाउँहरूमा पनि लागेको छ, प्रशासन हुनुपर्ने ठाउँमा उपस्थित भएको छैन,” उनले भनिन्, “त्यहाँ सरकार चुकेको छ । गोली लागेको कुरा छ ।” न्युज एजेन्सी नेपाल