काठमाडौं । नेपाली कांग्रेसका सांसद मोहनबहादुर बस्नेतले सरकारको कमजोरीका कारण राजावादीको प्रदर्शन अराजकतामा परिणत हुँदा पनि प्रहरी निरीह बन्नुपरेको टिप्पणी गरेका छन् । आइतबार (चैत १७) नयाँ बानेश्वरस्थित संघीय संसद् भवन परिसरमा सञ्चारकर्मीसँग उनले यस्तो बताएका हुन् ।

राजावादी प्रदर्शनकारी कहिले जुलुस निस्केला र लुटौँला भनेर बसेको देखिएको समेत उनले टिप्पणी गरे । “तीनकुनेमा जुलुस निक्लिने, भाटभटेनीमा लुटपाट मच्चिने । कहिले जुलुस निस्केला र लुट्न पाइएला भनेर हेरिबसेको देखिएन ? देखियो नि ! त्यो त नेतृत्वले जिम्मा लिनुपर्छ नि,” उनले भने ।

उनले राजावादीले राजनीतिक इच्छाले नभई धमिलो पानीमा माछा मार्ने उद्देश्यले प्रदर्शन गरिरहेको तर्क गरे । “राजनीतिक इच्छाका कुराले भन्दा पनि धमिलो पानीमा माछा मार्ने उद्देश्यका साथ गतिविधि अघि बढेको त देखियो नि,” उनले भने ।

मान्छे मार्ने र निजी सम्पत्तिमा आगजनी तथा लुटपाटको अवस्थामा प्रहरी ‘साइत हेरेर बस्न नहुने’मा उनले जोड दिए । उनले भने, “सार्वजनिक सम्पत्तिमा आगजनी भइसक्यो, मान्छे मर्न थालिसके, लुटपाट भइराछ भनेपछि प्रहरीले साइत हेरेर बसेर हुन्छ ?”

सरकारको गम्भीर त्रुटिका कारण जनधनको क्षति भएको उनले जिकिर गरे । न्युज एजेन्सी नेपाल