काठमाडौं । प्रतिपक्ष दलका नेताले संसद्को अवरोध खुलाउन सरकारले प्रस्ताव ल्याउनुपर्नेमा जोड दिएका छन् । कुनै प्रस्तावबिना संसद् बैठक चल्न नदिने विपक्षीको अडान छ ।

संसद् बैठकका विषयमा मंगलबार (जेठ २०) बानेश्वरमा विपक्षी दलका नेताको बैठक बसेको थियो । बैठकबाट तीनबुँदे निष्कर्ष निकालिएको छ ।

“सरकारले सदन खोलौँ मात्रै भनेर भएन । हामीले गृहमन्त्रीको राजीनामा मागिरहेका छौँ, उच्चस्तरीय छानबिन समिति बनाउने कि के गर्ने ? सरकारको प्रस्ताव आउनुपर्‍यो,” विपक्षीको बैठकपछि एक नेताले बाह्रखरीसित भने, “सदनको अवरोध खुलाउन सरकारले प्रस्ताव ल्याओस् ।”

• विपक्षी नेताको बैठक : यी हुन् तीनबुँदे निर्णय

उक्त बैठकपछि प्रतिपक्ष दलका प्रमुख सचेतकहरू सभामुख देवराज घिमिरेको कार्यकक्षमा जारी छलफलमा सहभागी भएका छन् । त्यहाँ यही विषय राखिने ती नेताले बताए ।

गृहमन्त्री रमेश लेखकको राजीनामाबिना संसद् बैठक सञ्चालनका निम्ति विपक्षी तयार भएका छैनन् । विपक्षीको अडान र सभामुखले गरिरहेका छलफलका कारण प्रतिनिधिसभा बैठक बस्न ढिलाइ भएको छ । प्रतिनिधिसभा बैठक आज बिहान ११ बजे सुरु हुने तय थियो ।