काठमाडौं । प्रधानमन्त्री कपमा सुदूरपश्चिम प्रदेशविरुद्ध मधेस प्रदेशले ६४ रनको जित निकालेको छ ।

मंगलबार सिद्धार्थ नगर रंगशालामा सम्पन्न खेलमा मधेस प्रदेशले प्रस्तुत गरेको १०३ रनको लक्ष्य पछ्याउने क्रममा सुदूरपश्चिम २९ ओभरमा ५८ रनमै समेटियो ।

सुदूरपश्चिमका हेमन्त धामीले १९ रन बनाए । उनीबाहेक अन्य खेलाडीले दोहोरो रन बनाउन सकेनन् । सुदूरपश्चिमका पाँच खेलाडी शून्यमा आउट भए । जसमध्ये तीन खेलाडी ‘गोल्डेन डक’ भए ।

सुदूरपश्चिमलाई सस्तैमा समेट्न मधेसका विशाल पटेलले ६ विकेट लिए । उनले ६ ओभरमा दुई मेडन फ्याक्दै १८ रन मात्र खर्चिए । प्रदीप पासवानले तीन विकेट लिँदा रुपेस सिंहले एक विकेट लिए ।

त्यसअघि मधेसले ४२.३ ओभरमा सबै विकेट गुमाउँदै १०२ रनको योगफल खडा गरेको थियो ।

मधेसका प्रदीप पासवानले सर्वाधिक २३ रन बनाए । पवन सराफले १९ र दिपेश दासले १२ रन बनाए ।

बलिङमा सुदूरपश्चिमका हेमन्त धामी र शेर मल्लले समान चार विकेट लिए । नारायाण जोशी र विकास आग्रीले पनि समान एक विकेट लिए ।

जितसँगै मधेसले आठ खेलबाट ६ अंक बनाएको छ । पराजित सुदूरपश्चिमले नौ खेलबाट समान ६ अंक नै जोडेको छ । यी दुई टिम अंक तालिकामा क्रमशः सातौँ र आठौँ स्थानमा छन् । दुवै टिमको सेमिफाइनल सम्भावना भने समाप्त भइसकेको छ ।