काठमाडौं । चलचित्र ‘कर्मा’ नेपाली सिने नगरीमा आइरहेका भन्दा फरक खालको चलचित्र भएको यसका कलाकारहरूले बताएका छन् । स्टोरी र न्यारेसन फरक हुँदा आइरहेका भन्दा यो चलचित्र भिन्न रहेको कलाकारहरूको दाबी छ । 

‘कर्मा’का खलपात्रको भूमिकामा रहेका मुकुन भुसालले निर्देशक सौरभ चौधरीले स्टोरी फरक तरिकाले प्रस्तुत गरेको बताउ । कथा भन्ने तरिका पनि फरक हुँदा ‘रेगुलर’ आइरहेका भन्दा यो चलचित्र फरक रहेको उनको भनाइ छ । 

अभिनेत्री सरिता गिरीले ‘कर्मा’ले नेपाली चलचित्र उद्योगमा रहेको आमा चरित्रका भाष्य नै बदल्ने बताएकी छन् । 

आफूले अहिलेसम्म थुप्रै चलचित्रमा आमाको भूमिकामा काम गरेको तर ‘कर्मा’मा भने अरुमा भन्दा फरक रहेका उनको भनाइ छ । 

“आमाको चरित्र त अहिलेसम्म धेरै गरेँ होला । तर, कर्मामा आमाको चरित्र मात्रै छैन,” उनी भन्छिन्, “यसमा आमासँग सँगै धेरै कुरा छ । यसमा निर्देशकले यो क्यारेक्टरलाई यसरी चलाउनुभयो, अहिलेसम्म चलेको आमाको ट्यागलाइन यो चलचित्रले हटाइदिनेछ ।”

निर्देशक चौधरीले जतिसुकै गलत काम गरे पनि त्यसलाई भाग्यले सजाय दिने बताए । “कसैले गलत काम गरेर म बाट तारिफ पाइरहेको छ भने पनि कुनै न कुनै समय अर्को कसैबाट उसले त्यसको मूल्य चुकाउनुपर्छ,” उनी भन्छन्, “यही नै कर्मा हो । यसमा विश्वास गर्ने भएकैले मैले यो चलचित्र बनाएको हुँ । त्यसैले म भन्छु, सबैको राम्रो गरौँ ।”

नायिका उपासना सिंह ठकुरीले एक्सन गर्ने नायकको अपोजिटमा रहे पनि आफू भने ‘कर्मा’मा एक्सन भूमिकामा नरहेको स्पष्ट पारिन् । तर, एक्सन सिनेमामा काम गरिरहँदा आफूलाई पनि एक्सन सिनेमामा काम गर्ने रहर भने पलाएको र त्यसको अफरको अपेक्षा रहेको उनले बताएको निर्माणपक्षले प्रेस नोटमा उल्लेख गरेको छ । 

चैत २९ गते रिलिज हुने चलचित्रमा विपीन कार्की, उपासना सिंह ठकुरी, मुकुन भुसाल, दिब्यदेब, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालागायतको पनि अभिनय रहेको छ ।

सिनेमाको कथा निर्देशक चौधरी स्वयंले लेखेका छन् । ‘कर्मा’मा भाष्कर स्वाँरको संगीत निर्देशन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र निमेष श्रेष्ठको सम्पादन छ ।

तारानाथ न्यौपाने मुख्य सहायक निर्देशक रहेको सिनेमामा समीर मियाको भीएफएक्स, उत्तम न्यौपानेको व्याकग्राउन्डस्कोर, शाहिल खानको टिजर–ट्रेलर, विजय बाश्यालको पब्लिसिटी डिजाइन र राजेन्द्र मोक्तान कलरिस्ट रहेका छन् । 

आर्टिस्टिक इन्टरटेनमेन्टको प्रस्तुति रहने ‘कर्मा’ मा वसन्त लम्सालको लगानी रहेको छ ।